India-a space agency chuan an rocket hmangin UK-a hmunpui nei satellite company OneWeb nena tangkawpin internet satellite 36 zet an kap kai tih an sawi a, Ukraine-a indona a chhuah avanga rei tak an tihkhawtlai chu an tihlawhtling thei ta.
Sorkar hnuaia firm, New Space India Limited leh OneWeb ten sumdawnna lam thila thawhhona thuthlung an ziah behchhanin Indian Space Research Organisation (ISRO) chuan an rocket hmangin Pathianni tuk khan thlalemte hi an tumna hmuna awm turin hlawhtling takin an kap chhuak a ni.
ISRO Chairman Sreedhara Panicker Somanath chuan, “Tun hi sumdawnna lam hawi atana rocket thar, LVM3 [Launch Vehicle Mark 3] kah a nih vawi khatna a ni,” tiin Pathianni zing dar 12:07-a Satish Dhawan Space Centre, Andhra Pradesh atanga kah chhuah chungchang chu a sawi.
Tun tuma kah chhuah hi India rocket rinchhana OneWeb satellite kah chhuah 14-na a ni tawh a, dan pangngaiah chuan sorkar thil kah chhuah thin a ni a. OneWeb thlalem hmasa ber hi kum 2019 kah chhuah a ni.
March thla khan OneWeb hi Russian Space Agency nen Moscow-in Ukraine a rûn avanga inthenin hemi hnua thlalem a kah chhuah leh hmasak ber a ni.
British company hian indona avangin kuminah harsatna lian tak tawk mah se nakuma khawvel huap chawm thei tur thlalem 648 zet kah chhuah hman an tum chu tihhlawhtlin ngei an la tum a. Tunah hian khawvel hmar lam deuh zelah chauh service hi an la pe a ni.
ISRO-in an website-a an tar lan dan chuan thlalemte hi kual (ring) 12-ah khawvel an hel ang a, ring pakhat zelah hian thlalem 49 zel awmin lei atanga km 1,200-ah khawvel an hel dawn a. Satellite tin hian minute 109 zelah khawvel an hel chhuak hman dawn a ni.
OneWeb satellite pakhat hi kg 150 chuang hret zela rit a ni hlawm.