Italy champion AC Milan in kaithar club Monza mikhualin an lakah 4-1 in hnehna an chang.
An hmelma Inter Milan pawhin goal li an khung a, mahse Fiorentina nen an inkhelah huntawp dawnah chakna goal khung thei chauhin 4-3 in an chak.
San Siro a inkhelah AC Milan midfielder Brahim Diaz chuan first half-ah goal hnih a khung. Monza hian khung let teuh ve thovin Milan goalkeeper Ciprian Tatarusanu chuan a team a chhanhim leh thin.
Second half-ah Divock Origi leh Rafael Leao ten goal an khung belh a, hemi inkarah hian Monza tan Filippo Ranocchia chuan goal khat a khung.
Milan coach Stefano Pioli chuan, “Result en aiin zanin inkhel a hautak a, Monza kha an kheltha hle. First half-ah ball chang hnem mah ila kan hmang tangkai tawk lo thin.” tiin inkhel a thlirlet.
Stadio Artemio Franchi-ah Inter Milan striker Lautaro Martinez chuan goal hnih a khung bakah assist vawi khat a neih zanah chak turin huntawp dawn thleng an beih a ngai.
Nicolò Barella goal a siamsak hnua aman a khung chu La Viola tan Arthur Cabral leh Jonathan Ikoné ten an chhanglet.
Martinez bawkin khung lehin hei hi minute 90-naah Luka Jovic chuan a sut a, mahse Inter tan Henrikh Mkhitaryan chuan chakna goal a khung.