Russia chuan Ukraine-a energy grid-te chu ‘nasa takin a bei thar leh’ niin Ukrainian President Volodymyr Zelensky chuan a sawi.
Tun tuma an beihnaah hian ‘an tuam zau hle’ niin a sawi a, Ukraine khawthlang, laili, chhim leh khawchhak lam region-a mite an bei niin a sawi.
Kyiv chuan an rama chhungkaw maktaduai 1.5 dawnin electric an nei lo mek niin a sawi.
Hetih rual hian Zelensky chuan Russian missile leh drone te chu an tum an fuh hmain a tam zawk an lo kah thlak hman thu leh Moscow chet thar lehna hian Ukrainian sipaiten hma lam an panna a dal dawn loh thu a sawi bawk.
“Russian missile leh drone zawng zawng chu kan lo kap thla thei lo ngei mai a, kan thawhpuite min puihna azarah an thawh ripna chu nasa takin kan tinep dawn tih chiang takin ka hria,” tiin Ukrainian hruaitu hian Inrinni zana video-a thu a sawinaah a sawi.
Thawhtanni atanga beihna nasa zawk an tawh hnuah Ukraine-a power station leh an energy siam chhuahna hmun hmun thuma thena hmun khat zet chu tihchhiat a ni tawh.
An beih hnuhnung ber tum hian an khawpui, Kyiv chhimchhak lama Cherkasy region leh khawthlang lam kila Khmelnytskyi khawpui pawh an bei tel.
Chhim lama Odesa leh hmarthlanga Rivne leh Lutsk-ah pawh thlawhna atanga kah leh power khaihlak a awm thu sawi a ni bawk.
An rama electricity operator, Ukrenergo chuan tun thla tira nasa taka bomb hmanga beihna an tawh aiin tun hnaia beih an tawhna chuan power pek leh siamna hmun a tichhe nasa zawk niin a sawi.
President Zelensky chuan Inrinniah khan rocket 36 kah chhuah a nih thu leh a tam zawk chu an kah thlak thu a sawi.
Zan lama thu a sawinaah chuan beihna an tawh avanga region eng emaw zata power khaihlak an tawrh chu siam tha turin thuneituten hma an lak nghal mek thu a sawi.
Khawthlang lama Lviv khawpui deputy mayor, Serhiy Kiral chuan Inrinni khan BBC hnenah Russia thiltih dan chu thlasik tak tak lo thlen hmaaa an hmunpuite tihchhiat a nih thu leh a hmatawng lam bakah a laili lai pawh an bei zel niin a sawi.
“Ukrainian sipaiten indona mualah hma an sawn zel a, hetih lai hian in lam min rawn bei ve thung a. Hei hi a chhan chu Russia hian civil leh an hmunhmate bak beih theih an neih tawh loh vang a ni,” tiin Newshour radio programme-a an kawmnaah a sawi a ni.
Zirtawpni khan Zelensky chuan Russia hian chhim lam, Moscow sipaiten an thunun mek, Kherson region-a hydroelectric dam pawh beih an tum niin a lo sawi tawh.
Kakhovka hydropower plant hi tihchhiat a nih vaih chuan mi sang tel tui lian avanga an dinhmun a derthawn dawn thu a sawi a. Russia erawh chuan chutiang ruahmanna an neih loh thu leh Ukraine zawkin missile-a dam hi an kah thu a sawi.
Tuikhuah hi Russia-in River Dnieper kâna hmun thenkhat an awp lai, Kherson region an tlawhpawh theihna tlem awm chhun zinga mi a ni mek.
Kherson-ah hian Ukrainian sipaiten hma an sawn zel avangin indona a nasa a, mi tam takin khawpui hi tun hnaiah an chhuahsan phah mek.