Finance minister hlui, Rishi Sunak chuan United Kingdom prime minister nih a tum tih Pathianni khan a tichiang ta a, Conservative Party hruaitu leh prime minister ni nghal bawk tur thlan tur chu a chuh dawn.
An party chhunga hruaitu thlan turah hian chuh turin an MP zinga 100 talin an thlawp a ngai a, hemi tur hi Sunak-a hian a nei tling tawh a. Chuh ve tum dangte ai pawha nei tam zawk tawhin a tlin beiseina a lian hle.
“Kan ram economy siam thain, party tihpumkhat leh kan ram mamawh pek ngei ka duh,” tiin Twitter-ah a tar lang a. An party-in hruaitu an thlan chhuah tur chuan ‘British mipui chhuah lo awm leh turte tan a awm mekte aiin remchanna tha zawk a siamsak dawn’ tiin a sawi bawk.
Kum 42 mi, parliament-a Tory member 128 vel thawptu nei mek hi a pu hlui, Boris Johnson nen an inkhin hmel a, ani pawhin inthlah chuh tura thlawptu neih ngai zat a nei tawh niin a inchhal.
Johnson-a hian a chuh dawn tih erawh chiang takin a la sawi lo thung a. Anni pahnih bakah hian Commons Leader Penny Mordaunt pawhin chuh ve a tum bawk.
Johnson-a leh Sunak-a hi Inrinni zan khan hmaichhanah an inbe nghe nghe nia sawi a ni.
Prime minister hlui, Johnson-a hi Caribbean-a chawlh a hmanna atangin Inrinni khan a hawi a, a bân atanga reilo teah kir lehnghal a tum nia sawi a ni a, Sunak-a nena an inkawm thu hi BBC leh thuthar thehdarhtu dangte pawhin an tar lang hlawm.
Liz Truss-i chu ni 44 chauh prime minister a ni hman tihin a ni 45-naah, chhiah lak tihtlem a tumna a tlang zawh loh hnu leh chhiah lak tihtlem avanga sorkar sum hmuh kiamna hnawh khah dan tura ruahmanna a neihin mi a hmun zawh loh avangin UK prime minister atangin a bâng a, ni rei lo ber a ni nghe nghe.
Johnson-a hi kum thum Downing Street-a a khawsak hnuah July khan a bâng a, ani hi thubuai neuh neuhvin a chim reng a, Covid avanga inkharkhip laia intihhlimna huaihawta puhna pawh a tel.
Conservative Party hruaitu thlan tura chuh tumte tan Thawhtanni thleng hming pekna hun hawn a ni.
Mi pakhat aia tamin an chuh a nih chuan vote thlak a ngai dawn a, October 28-ah tihfel hman a ni ang.
UK inthlanpui hi December, 2024-a neih tur a ni.