Cyclonic storm ‘Sitrang’ chu insiam chak telh telhin Bangladesh a pan mek zel a, weather department chuan West Bengal leh hmarchhakah te ruah tam tak leh thlipui a thawk thei tih a sawi lawk.
Thawhtanni zing dar 8.30 khan Bengal-a Sagar Island chhim lam km 380-a hla, Barisal, Bangladesh chhimthlang km 670-a hlaah a awm mek niin India Meteorological Department (IMD) chuan a sawi.
“Cyclonic Storm ‘SITRANG’ hi darkar 12 chhungin severe cyclonic storm-ah a insiam hman ngei a rinawm a. Bangladesh vaukama Tinkona Island leh Sandwip inkar, Barisal bulah October 25 zing lamah khawmual a kai a rinawm,” a ti.
Weather department chuan Thawhtanni leh Thawhlehni atan Bengal-a vaukam hrul district – North leh South 24 Parganas leh Purba Medinipur tan inkaihhruaina leh inralrinna a tichhuak.
“Bay of Bengal khawthlang laili leh khawchhak lailia cyclonic storm inumung mek chu severe cyclonic storm-ah a chang dawn a, sangha mantute chu October 25, 2022 thleng tuipuia lut rih lo tura tih an ni,” an ti.
Weather department hian di in leh puan in vel a chhe thei a, kawngpui pawh tuiin a chim thei bawk niin an sawi.
Thuneitute chuan South 24 Pargana-a lui lian thei avangin mipuite chu lui kama khawsa lo tur leh a him china insuan turin an ti.
Weather department hian hmachhakah pawh ruah tam tham tak leh thlipui a thawh theih thu an sawi a. Tripura chu a tuar na ber tur niin darkar 24 chhungin mm 200 thleng an dawng thei dawn niin IMD chuan a sawi.
Tripura, Assam, Mizoram, Manipur leh Nagaland-a hmun eng emaw zatah red alert tihchhuah niin Arunachal Pradesh-a hmun thenkhatah a nep deuh zawk, orange alert tihchhuah a ni.
Tripura sorkar chuan Nilaini thleng zirna in a khar a. National Disaster Response Force (NDRF) mite chu inralring tura hriattir an ni bawk.