Hel pawl lian lem lo tak; mahse, tharum thawh nasa tak, Paraguay-a thingtlang khaw tam taka firfiak taka che thin left-wing hel pawla an hruaitu ber chu sipaite nen an inbeihnaah a thi tih thuneituten an sawi.
Osvaldo Villalba-a hi Paraguayan People’s Army (EPP) hruaitu niin an pawl hi Paraguay hmun hrang hrangah mi thah leh ruk bovah inhnamhnawihna an nei.
EPP-in mi an man tawh zingah hian an ram vice-president pawh lo ni tawh, Óscar Denis pawh a tel a ni.
September, 2020 khan Denis-a hi an ru bo a ni.
Sipai hotute chuan Pathiannia Amambay province-a an patrol laiin silai puak thawm an hriatna lam chu bawhzuiin inbeihna a thleng ta niin an sawi.
Silai a puahna hmun an thlen chuan ram leilung luah hmasatu hnam zinga mi pahnih ruang an hmu a, pakhat chu hel pawl hian an lo hliam bawk tih an hmu.
A titute nen hian inkap zui nghalin hel pawla mi pathum an that a, an zinga pahnih chu tute nge an nih an hre thei tawh a, pakhat erawh an la hre lo.
Kutze thla an lak atangin pakhat chu police-in an lo chhinchhiaha kum 39 mi, Villalba-a ngei a ni tih an hre thei ta tih an sawi.
Osvaldo Villalba-a hi Carmen Villalba-a nau a ni a, a u hi EPP dintu zinga mi niin kum 2004-a a tanna lung in atanga chhuah tuma a beihnaah police officer pathum thah tuma puh niin thiam loh a chang a, kum tam tak lung in tang tura hrem mek a ni.
Ruang dang pakhat hi Luciano ‘Luchi’ Argüello niin EPP member tho a ni a. A unaute pahnih, Jonny leh Benicio pawh an pawla tel thin tho niin kum hnih kal ta khan kah hlum an lo ni tawh thung.
Paraguay President Mario Abdo chuan Pathianni khan EPP member-te chu inpe mai turin a sawm.
“Tute tan mah zan hlimawm a ni lo,” a ti a. “Hei hi kan duhthusam neih theih nana kan beihna kawng a ni lo va. Commander-in-chief ka nih angin muanna thlen turin ka duh a ni,” a ti.
Villalba-a thah a ni hi EPP tan chuan a pawi thei dawn hle a, an pawl hi Paraguay-a ran vulh nasatna lai biala che tla deuh ber an ni.
An pawl hian mi an ruk bo leh mi pawisa an chhuh luih hmangin sum an tuak ber a, anni erawh chuan mipuite telna rorelna a awm theih nana bei niin an insawi.
Vice-president hlui Denis-a bakah hian kum 2016 khan rancher Félix Urbeita an lo ru tawh a, police officer Edelio Morínigo pawh kum riat kal ta khan an ru bo va. Morínigo hi an that tawh nia hriat a ni.