Govt. Lungsen High School-ah zirtirtu nghet dah thuai phutin, sorkar kar nan ni thum chhung total bandh kalpui tum mah se education department-in zirtirtu dah tura ruahmanna a siam avangin bandh an huaihawt tan niah tihtawp leh nghal a ni.
Lungsen Joint NGO Coordination Committee chuan an lo rel tawh angin an khuaah ni thum chhung total bandh kalpui turin nimin khan kawng an dang tan a, nawrhna an kalpui lai mek hian BDO kaltlangin education department-in hma an lak tum dante NGO CC chu hrilh hriat an ni.
School Education director-in boruak muanawm taka a kal hunah zirtirtu nghet dahna order tihchhuah a tum thu BDO-in a hrilh chungchang chu NGO CC hian chawhnu khan an sawi ho nghal a, education department hmalak tumna chu zahawm tiin Aizawlah lam kal tira hmalak chhunzawm an rel a, tlai dar 5 khan bandh chu an titawp ta a ni.
Lungsen High School-a zirtirtu nghet dah tura kar an nih chunchanga an hmalak dan The Zozam Times-in a zawhna chu Education Director Dr H Lalthlangliana chuan chhangin, Lungsenah hian zirlai dinhmun ngaihtuahin zirtirtu indaih tawk tur dah a ni tawh chung chungin a nghet hrim hrim dah loh chu an ngaih a that loh avangin sorkar pawhin an rilru tur hrethiamin kawng a dap lui hram hram tih a sawi.
Education director chuan zirtirtu transfer chu a rualin thla thum danah khawih a ni thin a, chumi chu tunlai hian khawih mek a ni tih sawiin, “Hemi rual hian Lungsenah pawh zirtirtu nghet dah theih dan a awm em tih zawng telin dah tur pawh ruahhman fel a ni tawh,” a ti.
Lungsen khawtlang hian nawr lo mah se an duhnate hriain sorkarin chin fel nan ruahmanna a siam fel tawh tih a sawi a, “Lungawi lohna lantir zawng ni lovin fel taka inzawh chian hmasak nise order chhuak nghal mai thei tawh tur a ni,” a ti a, mipui hrsatna siam zawng ni lova tha taka thil kalpui a nih hnuah zirtirtu nghet dahna tur order chu chhuah a ni dawn tih a sawi a ni.