Khawzawl Zaingen YMA hall-ah nimin khan Faina beihpui thlak programme hman a ni a, Deputy Chief Minister, UD&PA changtu leh bialtu MLA ni bawk Tawnluia’n hmanpuiin, Khawzawl kha- wpui chhunga chhungkaw tin tan bawlhhlawh bawm – bawlhhlawh tawihthei leh tawih thei lo paihna a sem.
Tawnluia chuan faina beihpui thlak chuan rah tha a chhuah ngei a beisei thu leh heta tel te pawh faina lama zirtirtua an tan a beisei thu a sawi a. Khawzawl khawpuiah faina beihpui thlak ni mahse, a tihlawhtling tur chuan sorkar atanga order chhuah leh inkaihhruaina pek ringawt a tawk lova, mi thinlungah faina pawimawhzia leh fai duhna thintlung a awm phawt a ngai tih sawiin, “Faina kawngah a mawhphurtu ber leh hma la nasa ber tur chu keimahni mimal theuh hi kan ni” a ti.
Bawlhhlawh tawih thei leh thei lo thliar hran chu faina lama hmalak bultanna a nih thu sawiin, Tawnluia chuan Khawzawl khawpuiin faina lama hma a lak theihna tur leh hmalak bul lo tan tawh tiphuisui turin bawlhhlawh bawm in tinah pek tum a nih thu a sawi bawk.