YMA Rorel Inkhawm vawi 3-na chu nimin khan Thingsulthliah khelmuala Zobuk Run-ah neih a ni a, thurel tur chhawpchhuah, rorel palaiten an pawm zingah ‘eirukna leh hlemhletna a reh theih nan CYMA-in tun aia chak zawkin hma la rawh se’ tih a tel.
Hnam dang hnenah in hmun, lo ram lei leh hralh/hlan chhawn zel a nih lohna tura Mizorama in hmun, lo/ram hralh leh inhlan chhawn turah reng reng YMA hriatpuina tel zel tura hmalak rawtna pawh YMA rorel palaiten an pawm a. YMA inkhawmpui hminga general conference tih thin, ‘YMA Inkhawmpui Lian’ tia thlak rawtna pawh an pawm.
YMA chetvelnaa hliampui tuar/nunna chân an awm palha CYMA-in tanpuina/râlna pe thin tura rawtna pawh an pawm a. Zonun ze mawi uar zawka inzirtir rawtnate, thangthar zinga Mizo tawng hlutna tlahniam zel titawp tur leh Mizo tawng dik hman a nih theihna tura hmalak rawtna te, Mizoramah land reform kalpui a nih theihna tura hmalak rawtna te, Mizo hnuchhamte hnam dangin faa an lak lohna tura hmalak rawtna te an pawm bawk.
Sorkar khawih zingah – Mizoramin market regulation a neih mek chak taka kalpui a nih theihna tur leh Mizoram mipuiin tangkai leh awlsam zawka an chhawr theihna tura hmalak rawtna te, Mizoram hmun hrang hranga sorkar damdawi inte hmanraw tha zawk leh thawktu tam zawka thuam tur leh a enkawl kawngah pawh tun aia khauh zawk leh tha zawka kalpui tura sorkar phutna te pawh an pawm.
Myanmar raltlan, hmun hrang hranga awm darhten harsatna lian zawk an la thlen thei dawna a lan avangia relief camp changtlung zawk siam tur leh chu miah chuan dah vek tura hma la tura sorkar nawr tura CYMA beiseina leh Mizoramah vocational course zirna tun aia uar zawka kalpui rawtna te pawh rorel palaite chuan an pawm bawk.
Rorel inkhawm hi CYMA President R. Lalngheta’n a kaihruai a, chawhma lamah YMA General Conference 2021 leh kumin rorel inkhawm inkara YMA member chatuan ram pante sunna hun an hman bakah general secretary leh finance secretary ten report an pe.
YMA Rorel Inkhawm hi CYMA hruaitute leh OB lo ni tawh te, sub-headquarters OB leh executive committee member 10 theuh, group YMA aiawh leh branch aiawh mi paruk theuh tel theihna niin, tun tumah hian rorel palai mi 1,452 an tel a ni.