Aizawl: Mizo Writers’ Association (MWA)-in Vanapa Hall bathlara ni nga chhung Lehkhabu Pho Rûnpui an buatsaih chhungin lehkhabu Rs nuai 9 chuang man hralh a ni.
October 25-29 chhungin Lehkhabu Pho Rûnpui hi neih a ni a, lehkhabu chi hrang hrang 2,150 zet pho chhuah niin Rs.9,09,350 man hralh a ni.
MWA hruiatuten an sawi danin, Vanapa Hall bathlara lehkhabu an dah tan ni, October 24-ah Rs.14,755 man hralh a ni a, ni 25-ah Rs.1,49,300, ni 26-ah Rs.1,65,465, ni 27-ah Rs.1,81,865, ni 28-ah Rs.2,46,815 leh a khar ni October 29-ah Rs. 1,51,150 man hralh a ni.
Lehkhabu Pho Rûnpui kharna inkhawm tawi, Inrinni chawhnua neiha thusawitu, MWA President R Lallianzuala chuan ziak mite chawisanna tur, Lehkhabu Pho Rûnpui an buatsaih chu an beisei aiin mipuiin an hlut thu leh, a tlawhtu tam zawk chu thalai rual an ni a, kum upa lam pawh an tam thu a sawi.
An ruahman lawk dan chuan Thawhlehni atanga Zirtawpni thleng neih tur ni mah se mipuiin an hlut em avangin Inrinni thleng lehkhabu pho chhuah a nih thu sawiin, tun atanga thla rei vak lohah buatsaih leh ngei an tum thu a sawi.