Union Minister of State for Agriculture & Farmers Welfare Kailash Choudhary chuan nimin khan Aizawla BJP State Office a tlawh a, party mite hmaah thu sawiin kum 2023-ah Mizoramah BJP sorkar turin hma an la dawn tih a sawi.
BJP sorkar hnuaia Mizoram mipuiin hmasawnna a taka an chhawr theihna turin Mizoramah BJP sorkar a tul tih sawiin Choudhary chuan, “BJP Mizoram State President Pu Vanlalhmuaka kaihhruaina hnuaiah theihtawp chhuahin hma la ula, kum 2023-ah chuan Mizoramah BJP sorkar a pian theihna turin leh Mizoramin central malsawmna a taka an dawn theih nan MLA General Election-ah BJP sorkar kan hmuh ka beisei,” a ti.
Union minister hian Mizoramah BJP sorkar a awm hunah chuan state dangten hmasawnna an hmuh ang Mizoramin a neih ve theihna turin Mizoram mipuite pawh BJP hnathawh leh hmalaknate zirchianga thawhpui a tul tih a sawi a. PM Scheme hi Mizoram mipuiin an hriatfiah a, he mi kaltlanga mi retheiten an chanvo an chan ngei theihna turin BJP-te hian theihtawp chhuaha mipui an zirtir a, an hrilhfiah a tul thu a sawi bawk.