Hun engemawchen a khaihlak hnuah Rimawi Khawvel Music Award chu Vanapa hall, Aizawlah nakzanah semchhuah a ni leh dawn a, award category 15 semchhuah a ni ang. Zanin hian Rimawi Khawvel Music Award urlawkna concert Vanapa hall-ah neih a ni dawn bawk.
Tuntuma Rimawi Khawvel Music Award sem chhuah tur hi MSACS Rimawi Khawvel Music Award tih a ni dawn a, Health Minister Dr. R. Lalthangliana khuallian niin, entertainment lama tawnhriat nei tha pahnih Mickey Chhangte leh Zonuni Pachuau ten an kaihhruai ang a. Chuai thei lo Ngurthangvela hnenah Special Award for Lifetime Achievement & Singing hlan a ni dawn.
MSACS Rimawi Khawvel Music Award hlan zanah hian Rimawi Khawvel Music Award lo dawng tawh engemawzat zaiin an inlan dawn a. Pathian fakna hla lamah Mizo mipa Gospel singer zinga tun thlenga ngainatu ngah tak, kum 2007-a Male artist-gospel awardee PBK. Liankhuma leh a hunlaia Zofate thlen chin apiang al hneh em em, kum 2004-a Female artist-gospel awardee C. Lalhmingmawii te an zai ang.
Lengzem lamah tun thlenga huhang la nei tak, Pathian fakna hla saa rawngbawlna lama ke pen zui ta, kum 2003-a Male artist-lovesong awardee Joseph Zaihmingthanga, a hunlaia Zofate thlen awmna hmuntina lar, kum 2004-a Female artist-lengzem/lenglawng awardee Elizabeth Zodinpuii leh tun thlenga hma la sawn zel, kum 2005-a Female artist-lovesong awardee B. Malsawmtluangi te an zai dawn.
Rap lama Zofate sukthlek thlak danglam dawrhtu, kum 2007-a best rapper awardee Vincy Chhangte pawh a inlan dawn a, Folk singer zinga hman atanga tun thlenga mipui duh rawn leh sawm hlawh ber pawl la ni reng, kum 2002-a Folk singer awardee H. Vanlalhlana pawh hi he zan ti hlu zualtu hi a ni ngei ang.
Zokhaw tleitir hmanga invawrh, thawm nei zui ta vak lo C. Laltlanliana (Matlana) pawh MSACS Rimawi Khawvel Music Award sem zan hian a inlan dawn a, Mizo Idol thar T. Vanlalhmangaihi a inlan dawn bawk.