Aizawl: Govt. Aizawl North College (GANC) Students’ Union leader-ten an college ram tur an dil chu sorkar hotuten a rang thei ang bera a hmunhma teha a rang lama hmalakpui an tiam a, hemi avang hian sorkar kar nana lungawi lohna an lantir chu an titawp.
Govt. Aizawl North College zirlaite chuan college ram leh hmunhma tha zawk neih phutin Ningani khan an college bulah lungawi lohna lantirin kawngpui an dang a, nimin khan zirlaite chu an college bulah an pungkhawm leh a ni.
An thil phut chungchangah hian nimin khan GANC Students’ Union leader leh higher & technical department, UD&PA department, GAD, revenue department, Aizawl DC leh Aizawl SP te chu an thukhawm a, hetah hian sorkar aiawhte chuan zirlaiten an college ram tura an dil chu a rang thei ang bera hmunhma teha a rang lama hma lakpui an tiam a ni.
Hemi avang hian GANC zirlaiten lungawi lohna an lantir chu nimin tlai khan a titawp a, hetihlai hian sorkar hotuten an tiam anga hma an la vat lo a nih chuan tun aia nasa leh zuala lungawi lohna lantir leh an tum.
GANC Students’ Union leader-te chuan an college campus ngiata an hmalaknaah mipui khawsak phung an tihbuai avangin mipui hriatthiamna an dil a ni.