ZPM party chuan Mizoram sorkarin ramri chin fel dan kawng ngaihtuah tura boundary committee a dinin mipui a huap zo tawh loah an ngai a, ramri chungchanga inbiakna chu Mizoram sorkar hian a ngai thu tak tawk loah an ngai bawk.
Nimin khan ZPM party hruaituten Aizawl Press Club-ah chanchinbu mite kawmin ramri chungchanga sorkar hmalakna an duhkhawp loh thute an sawi a. The Zozam Times zawhna chhangin ZPM General Secretary Lalmuanpuia Punte chuan state boundary committee hian mipui a huap zo lo tih sawiin, “ZPM kan sorkar chuan Mizoram mipui aiawh zo tur committee kan din ang,” a ti.
Muanpuia chuan, “Boundary committee-a tel thin political party thenkhat pawh an inhnukdawk tawh a, a chhan chu ramri chungchangah sorkar kal danah ngaihthat tawk lohna an neih vang a ni a, chuvang chuan mipui huap zo chu a ni tawh lo,” a ti a, an party erawhin inhnuhdawhna chhan tur an la nei lo a, an tel chhunzawm zel dawn tih a sawi.
Ramri buaina chungchanga Mizoram leh Assam sorkar aiawhten inbiakna an neih thin chungchang chu ZPM-a PAC member TBC Lalvenchhunga chuan sawi belhin, “November 4-a inbiakna neih tur kha minister pahnihte ram thianghlima an zin avang leh president-in Mizoram a tlawh avangin Mizoram sorkarin sawn a dil a, Assam lamin assembly session an neih chhuanlama hun sawn rawtna chu an lo pawm lo bawk,” a ti a, an hmalakna thlir hian ramri chungchanga inbiakna chu sorkar hian a ngai thu tak lo hle nia a lan thu a sawi.
TBC Lalvenchhunga chuan NHDCIL-in Vairengte leh Sairang inkar kawng a zauh tura zangnadawmna buaina awm chungchang an zirchian thu sawi bawkin, “NH 306 four laning package hrang hrang thenah Vairengte police check gate thlang lam Mizoram enkawl huam chhunga chhungkaw 14 zet chu Assam lam package 2 lamah rin luh a ni,” a ti.
Assam lama rin luhte hian zangnadawmna buaipuitu, CALA, Addl DC hnenah Mizoram lama dah tura an ngen thu sawiin, CALA hian NHIDCL hnenah thlen chhawng mah se MoRTH thu lo chuan hma lak theih loh thuin an lo chhang tih a sawi a; NHIDCL-in forest clearance a mamawh angte Mizoram sawrkar hnenah a dilah sawrkarin a chhannaah map nen thil telin, Package 3, Vairengte Police chhak lam chauh chu an enkawl chin leh clearance dil ngaiin a chhang tih an sawi bawk.
Heng thil hrang hrang atang hian Mizoram sorkar hian ramria a pawm chin, BEFR 1875 chu sawi loh, tuna an ram luahlai leh enkawl chin takngial pawh hum ngam lo tih a lang tih TBC-a chuan a sawi bawk.