ZPM Thalai chuan Ramhlun North-a Aizawl North College building sak hna a muan chhan sawifiah turin Mizoram sorkar an phut.
Nimin khan thuchhuah siamin Mizoram sorkarin an RTI zawhna a chhan dan chuan Ramhlun North-a Aizawl North College building sak mek chu March, 2023-a sak zawh tura ruahman a nih laiin hna hi zaa 45 chauh la thawh niin, a sakna atan Rs 68,77,440 teh meuh pek chhuah a ni tawh tih an sawi.
“College building sak hna thawh muan lutuk avang pawh hian zirlaiten harsatna namenlo an tawk mek a ni tih chief minister-in a haider tlat hi pawi kan ti a, college building sak hna a muan em em chhan sawifiah turin Mizoram sorkar kan phut a, college building sakna tur sum hi MNF sorkar hian a chheprelh mai em ni? tih hi kan zawhna a ni,” an ti.
Aizawl North College zirlaite hnenah an college ram atana Falkland veng-a UD&PA ram ruak chief minister-in pek a lo tiam tawh hnuah leh, a ram pawh an teh hnuah chief minister-in zirlaite hmu duh lo a, lung bang sut ang maia zirlaite laka a awm hi mak an tih thu leh, zirlaite ngaihthahtu chief minister Mizoramin a nei chu vanduaithlak an tih thu an sawi.
ZPM Thalai chuan zirlaite hmasawnna daltu sorkar chu na taka an dodal zel tur thu an sawi bawk.