Aizawl : Health & Family Welfare department hnuaia Food & Drugs Administration (FDA), Mizoram-in tun hnaia Mizoramin damdawi quality endik tura Govt. Analyst, Regional Drug Testing Laboratory, Guwahati-a a thawn zingah Pantop- D SR batch number pathumte chu damdawi tha tawk lo (not of standard quality)- tih finfiah a ni.
FDA chuan Pantop-DSR Batch No. SPM211927, Pantop-DSR Batch No. SPA220030 leh Pantop- DSR Batch No. SPJ211372 te te chu dmdawi tha tawk lo a ni tih finfiah a nih thu an sawi a. He’ng Pantop-D SR-ahte hian a capsule maltina damdawi awm tura label-in a tarlan – Pantoprazole leh Domperidone te chu an awm lo (NIL) thak vek niin an sawi.
Pantop-D SR batch pathum siamtu anga tar lan Aristo Pharmaceuticals Pvt. Ltd ah he’ng damdawite hi zawh fiah tawh a nih thu leh, Aristo Company chuan an siam a nih loh thu chiang takin an sawi a. An insawifiahna hi pawm tlaka ngaih a nih bawk avangin he’ng damdawi tha lote hi a tak anpuia misual tute’n emaw a lem an siam chawp (spurious) a pawm a nih thu an sawi bawk.
Damdawi zuarte erawhin an damdawi kawl lai zingah khitiang batch number pu hi a awm em tih enfel vek a, an kawl a nih chuan hralhchhuak zui mai loin FDA Mizoram hnenah hriattir nghal tura tih an ni.
Heng damdawi tha lo (spurious) te hi Guwahati atanga lak chhawn a nih avangin Assam Drugs Controller hnenah thil awmzia hriattir nghal a ni a. Damdawi lem siama theh darhtu hi ngawrh taka chhui zui nghal an nih thu FDA Mizoram hian an sawi.
Tun thla tir khan Health & Family hnuaia FDA Mizoram hian Pantop-D SR quality endik hi Batch No. -SPM211927, Mfg. date -Dec 2021, Exp Date – Nov 2023 chu a label-a a lan dan anga chhungah Pantoprazole 40 mg (20 mg mum hnih) leh Domperidone pellets 30 mg awm tur a nih laia, endikna report-ah damdawi chi hnihte hi a awm lo ve ve nia a tar lan avangin damdawi ei tlak loh tia tarlan avangin mipui a tichiai hle chu pawi a tih thu sawiin, Pantop-D SR zawng zawng tha lo vek anga ngaih tur a nih loh thu leh a batch number tar lan ang pu chauhte ‘tha lo’ tih hian a kawk zawk avangin, ei mek tan pawh batch number dang a nih chuan hlauhthawn tur engmah a awm loh thu an lo sawi tawh a ni.