Real Madrid in World Cup hma a La Liga a an inkhel hnuhnung berah hnehna an chang a. Barcelona nena an inkar tizim turin 2-1 in Cadiz an hneh.
Santiago Bernabéu a Ningani zan La Liga inkhelah Real Madrid tan midfielder Toni Kroos a par vul.
La Liga champion lai tan German midfielder hian goal khat a khung bakah Eder Militao goal khung tur a siamsak.
Table mawng lama awm Cadiz in uluk takin goal an veng a, mahse goal khung teuh hmasa zawk an ni a. An defender Alfonso Espino chuan hla tak atangin goal bar a pet per.
Minute 40-naah Kroos-a ball vawrh luh duhthusam chu Militao-a’n a khung a. Real in hma an hruai hnuah Cadiz an tho leh tawh lo. Kroos-a’n minute 70-naah goal mawi a khung leh bawk.
Cadiz goal neihchhun hi minute 81-na a Lucas Pérez khung a ni ve thung.
Real chakpuitu Kroos chuan, “A tawp minute 10 tih loh kha chu kan kheltha viau in ka hria, goal thumna khung thei kan ni a, han khung ila engkim a awlsam ang. Mahse chak kan phu a, inkhel kha kan thunun zawk.” tiin a sawi a. A goal khung chungchang sawiin, “Ball lo kal kha ka duhthusamin ka pet fuh lova, mahse a lut ta tho a, ka lawm hle.” a ti bawk.