Juventus in second half a Moise Kean goal khung hmangin Hellas Verona an hneh a. 1-0 a chakin league-ah a zawnin vawi nga an chak tawh.
Stadio Marcantonio Bentegodi a inkhelah Verona inkhel a huaisen a, Ibrahim Sulemana hmangin goal an khung teuh nghal a. Juve defender Danilo chuan Yayah Kallon ball cross hlauhawm chu goal-ah an khung hma in a lo pet chhuak hman hram bawk.
Mahse halftime a goal a luh loh hnuah Juve in second half-ah goal an khung ta zawk a. Italy striker Kean-a’n minute 60-naah goal khungin Verona keeper Lorenzo Montipo chuan dang teuh mahse goal a lut tur a dal zo lo.
Juve defender Alex Sandro chu huntawp dawnah Kevin Lasagna hlauhawm taka a tlawh avangin hnawhchhuah a ni a. Mahse an tlem zawkna in inkhel a tidanglam thui hman lo.
Verona hi Serie A-ah a zawna vawi kua an tlawmna a ni a, table mawngphahah an awm mek.
Juventus coach Massimiliano Allegri chuan, “Kan khelhthat ber tum chu a ni hauh lo. Mahse hetiang team huaisen taka mi nawr tawm tlat tum thinte lakah hian kan insiamrem a ngai tih kan hria a, kan inkhelh dan kan thlak a tul thin. Duhthusam lo lai chu awm mahse ka naute inkhelh danah ka lung a awi.” a ti.