Manchester United in kartawpa an tlawmna siamtha in English Football League Cup round of 16 an lut a. Aston Villa nen inkhel lehin second half hmuhnawmah 4-2 in hnehna an chang.
Old Trafford a inkhelah hian United tan kum 18 mi Alejandro Garnacho chu chakna hnar a ni a. Inkhel thlak danglamtu niin an goal hnuhnung pahnihah a bultumtu a ni.
Villa in second half-ah Ollie Watkins leh Diogo Dalot own goal hmangin vawi hnih hma an hruai a. United in vawi hnih an si phurh an sut hnuah Bruno Fernandes leh Scott McTominay ten goal an khung a. Hnehna an chang.
Rawlthar duhawm
United chakna chu kum 18 mi Argentine forward a ni a. Substitute bench atanga dah luh hnuah inkhel thlak danglamtu chiang takin a ni.
Fernandes-a goal khung turin Villa goalkeeper ball pekchhuah sual chu pass vat nachang a hria a. Fernandes-a free lai a hmu thiam.
McTominay-a goal khung turin veilam sir atang ball lalutin duhthusamin a vawrh lut bawk.
United manager Erik ten Hag chuan Garnacho chungchang sawiin, “A rilru puthmang a dik zel a, hmasawn tuma nitin a beih phawt chuan player ropui tak a ni thei. Mahse nunkawng dik erawh a zawh a ngai.”
“A theihna hi en ila, attacking football-ah hmanraw tangkai a ni. Tlarhnung a tawm tlat thinte lakah a tangkai zual hle.” tiin a player hi a fak.
Garnacho hi United academy atanga beiseina sang tak nena thlir a ni thin a. Tun nipuiah pre-season inbuatsaihnaah pawh telh a ni tawh. Mahse a nungchang avangin hrem ngaiin a awm a, team meeting-ah tum hnih a tlai avangin inkhelhna hun siamsak lawk a ni lo.
Round of 32 inkhel zawhah hian round dawtleh inkhel tur pawh nghal an ni a. Round of 16 hi World Cup zawh veleh an khel nghal ang.
Carabao Cup Round of 16:
Wolves v Gillingham
Southampton v Lincoln City
Blackburn Rovers v Nottingham Forest
Newcastle v Bournemouth
Manchester City v Liverpool
Manchester United v Burnley
MK Dons v Leicester
Charlton v Brighton