Nepal chuan Indian tlanglawnmi pahnih leh an team leader chu kum 2016-a Mt Everest lawn chhuak anga insawia an lawn chhuah si loh avangin kum ruk chhung an rama tlang lawn thei lo turin an hrem.
Narender Singh Yadav leh Seema Rani Goswami ten tlang an lawn chhuah hi a hun lai hian tourism department pawhin a pawmpui.
Dawt sawiin an lo lawn chhuak lo tih hi Yadav-a zawk chawimawina dawng tura chhawp chhuah a nihnaah finfiahna phawrh tur tha a neih loh avangin hrem an ni.
Yadav leh Goswami hian hremna an tawrh tur chungchangah hian engmah an la sawi lo.
Khawvela tlang sang ber, metre 8,848.86 (29,032 ft)-a sang Mt Everest lawn chhuah hi tlanglawnmi tan chuan hlawhtlinna ropui a ni.
Yadav-a hi nikum khan Tenzing Norgay Adventure Award dawng tura chhawp chhuah a ni a; mahse, a thiannu nen hian an lawn chhuak tih finfiahna phawrh tur an neih loh avangin tlanglawn dangin an sawisel.
Nepal tourism ministry thuneitu pakhat chuan an chhuinaah tlanglawn ve dangte angin tlang chhip an thleng ngei tih finfiahna tur thlalak leh thil dang engmah phawrh tur an nei lo tih a sawi.
“Kan chhuinaah hian an lawn chhuak nia an finfiahna lehkha chu uluk takin kan zir a. Heng lehkha lem an thehluh leh thuneitute bakah sherpa nen kan inrawn hnuah hetiang thutlukna hi kan siam ta a ni,” a ti.