Aizawl: Kum thum dana thlan thin, Rokunga Award 2021 dawngtu turin Malsawmkima, kum 64, Saitual Venglai chu thlan a ni.
Rokunga Memorial Society chuan nimin khan Aizawl Press Club-ah kumina Rokunga Award 2021 dawng turin Malsawmkima, Saitual Venglai thlan a nih thu an puang a ni a. November 28, 2022 khian RB McCabe Hall, Aijal Club-ah award hi hlan a ni ang.
Rokunga Memorial Society buatsaih, kum thum dana thlan thin Rokunga Award chu kum 2018 khan siam tan a ni a. Nikum kha award buatsaih hun tur ni mah se Covid-19 avangin buatsaih theih a nih loh avangin kumin hian buatsaih a ni.
Central YMA remtihna leh hriatpuinain Rokunga Award dawngtu tur rawtna (nomination) siam turin YMA branch zawng zawngte hnenah Rokunga Memorial Society chuan ngenna a siam a. Branch hrang hrang eng emaw zat atanga rawtna lutte chu Rokunga Memorial Society-in a din Selection Committee-in ngun taka a zirchian hnuah rawtna lut atangin hming pathum thlan chhuah a ni a. Chung hming pathumte chu Rokunga Memorial Society nen an enho leh a, Rokunga Award dawngtu tur hi thlan a ni ta a ni.
Selection Committee-in hming pathum a thlanchhuah zinga hming an tlar hmasak ber chu, dan naranin Rokunga Award dawngtu tur hian thlan zui thin a ni tlangpui a ni.
Selection Committee-ah hian P. C. Lawmkunga, IAS (Retd.) chu chairman a ni a, Member Secretary chu C. H. Thangkhuma, Mission Vengthlang a ni.
Member dangte chu Dr. K. Rokhawla, Durtlang leh Dr. Rualkhuma Colney, Republic Veng an ni a, Rokunga Memorial Society atangin Selection Committee-ah hian C. Vanlallawma a tel bawk a ni.
Hlaphuahtu ropui, Rokunga zirtirna thu laipui, Mizo tlawmngaihna, huaisenna, taimakna, rinawmna leh tawrhchhelna nunpuitu leh nuna lanchhuahtirtu hnenah Rokunga Award hi hlan thin a ni a, chungte chu Rokunga Award dawngtu tur thlanna a tehfung ber a ni nghe nghe.
Rokunga Award Rokunga Award 2021 dawng tura thlan Malsawmkima, Saitual Venglai hi kum 1978-ah khan kum 20 mi a nih laiin Saitual khuaa tlawmngai bera thlan a lo ni tawh a, kum 2013-ah khan Saitual khawtlangin ‘Tlawmngai Nopui’ an lo hlan tawh bawk a. 16th Group YMA chuan a ma pual liau liauvin Office Bearer post pakhat Joint Secretary post an siam chawp sak a, amah lo chu 16th Group YMA-ah hian Joint Secretary dang an awm zui ta lo a ni.
Malsawmkima hi khawtlang tana a thahnemngaihna avangin kum 2006-ah khan mi sualin gelatine hmangin a chenna in a bomb-sak a. Kah hlum tuma veh a lo ni tawh a, chempuia sahhlum tumin a chenna inah luhchilh a ni tawh a, zu zuar pakhatin thah ngei tumin a bei tawh bawk a ni.
Rokunga Award hian tangkapui, citation leh sum fai Rs 50,000 a keng a ni.