Premier League club Southampton chuan Ralph Hasenhuttl thlaktu tur an lalut nghal a. Nathan Jones chu kum thum leh a chanve contract an ziahpui.
Kum 49 mi Jones hian Championship club Luton Town a chhuahsan a. Inrinni zanah Liverpool hmachhawnin bul a tan ang.
“He huntha siamsak ka ni hi ka lawm tak zet a. He club hi hman atang tawha thuk taka ka lo hmelhriat tawh a ni thin.” tiin Jones chuan a sawi.
Saints hian Thawhtanni khan kum li dawn an club enkawl tawh Hasenhuttl chu an chawlhtir a. A hnuaiah match 9 chhungin vawi khat chiah chak an nei a. Premier League-ah 18-naah an awm mek.