Indian Supreme Court chuan kum 1991-a kha tih laia prime minister, Rajiv Gandhi-a thahnaa thiam loh chantir mi paruk chu chhuah turin thu a titlu.
An zinga pahnih, S Nalini leh RP Ravichandran ten tan in atanga chhuah hma an dil hnu lawkah mi dangte nen hian chhuah an ni ta zawk a ni.
Heng mite hian May thlaa thiam loh chang dang pakhat, AG Perarivalan-a chhuah a nih hnuah court sang berah hian chhuah ve an dilna (petition) an thehlut a ni.
Thiam loh chang mi pasarihte hi dam chhung lung in tang tura hrem vek niin kum 30 chuang tan inah an awm tawh hlawm.
Zirtawpnia an chhuahna tur thutlukna a siamah Supreme Court chuan mi tangte hi tan ina hun an hman chhunga an awm tan ‘a lungawithlak’ tiin a sawi.
Gandhi-a hi May, 1991 khan thah a ni a, hei hi Sri Lanka-a Tamil Tiger helho phuba lakna nia ngaih niin prime minister hian kum 1987 khan thliarkar rama tualchhung indona awm mekah sipaite pui turin a sipai (peacekeeper)-te a tir a, hemi phuba hi nia ngaih a ni.
Gandhi-a telna, Congress party chuan court-in thiam loh changte a chhuah zalen mai chu an duh loh hle thu an sawi.
“Supreme Court-in tualthattute a chhuah hi pawm chi rual a ni lo. Congress party chuan pawi a ti tak zet a ni,” tiin party thupuangtu, Jairam Ramesh chuan thu a chhuah.
“He mi chungchanga India rilru hrethiam lova Supreme Court a che mai hi a vanduaithlak tak zet a ni,” a ti bawk.
Zirtawpnia Gandhi-a thattu chhuah tura tihte hi kum 1998-a trial court-in thi tura an chungthu a lo rel tawh mi 25 zinga mite an ni.
Court hniam zawk thutlukna hi court sang ber hian mi pasarihte lakah chauh a kengtlang a. Perarivalan, S Nalini, Santhan leh Sriharan te chu thi turin a ti a, mi dang pathum chu dam chhung tang turin a ti thung a. Mi dangte erawh puh an nihnaah thiam changin chhuah zalen vek an ni.
Nalini-i tihhlumna tur hi kum 2000 khan Gandhi-a thihsan, Sonia Gandhi-i’n nau a pai avangin tihdanglamsak tura a ngensak angin tihnepsak a ni.
Kum 2014 khan Supreme Court chuan Perarivalan, Santhan leh Sriharan te thi tura hremna pawh tihdanglamsak velehin khawngaih an dilna ngaihtuah pawh a tikhawtlai reng bawk.
Hetih lai hian Tamil Nadu sorkar chuan Gandhi-a beihna ruahmantute chhuah turin thu a titlu ve bawk a; mahse, sorkar laipui chuan dan hmangin state sorkar chu chhuah lo turin a dang.
“Rajiv Gandhi-a kha India leilungah ngei beih a ni a. Prime minister hlui leh kan hruaitu ropui bakah Indian pawisawi lo tam tak thattute chhuah hi dikna hlenna kawng a ni lo,” tiin hetih hun laia prime minister, Manmohan Singh chuan a sawi.
“Tu sorkar leh party mah firfiaka chetna dona laka kan nem tur a ni lo,” a ti.