Aizawl: Election Commission of India thu angin Nilaini khan Mizoram election department chuan Draft Electoral Roll tihchhuah tur denchhenin ‘A step for Participative Elections’ tih theme-a hmangin walkathon a huaihawt.
Walkathon tan hmain Laldinfeli, Assistant Chief Electoral Officer, Mizoram chuan Nov. 9-ah election department chuan ECI thu angin Special Summary Revision of Electoral Roll, 2023 atan Draft Electoral Roll a tichhuak a, hemi ni atang hian roll-a luh thar dilna te, hming chuang tawh siam that ngai siam that dilna leh a dangte a theh luh theih dawn tih sawiin, mipui nawlpuiin zau zawka an hriat theih nan walkathon hi huaihawt a ni tih a sawi.
David L.Pachuau, Joint Chief Electoral Officer, Mizoram chuan Directorate of Election office kawt, Mizoram Old Secretariat Building-I Treasury Square atangin zing dar 6:30 khan walkthon hi vai liamin school naupang bakah YMA branch hrang hrang atangin member eng emaw zat an tel a ni.