Health Minister Dr R. Lalthangliana hoin Mizoramah HIV/AIDS do zel dan tur leh mipui vantlangah tam zawka test kalpui theih dan tur an sawi ho.
Pathianni khan Delhi Mizoram House Conference Hall-ah Zoram Medical College leh AIDS Healthcare Foundation (AHF), Los Angeles, USA te’n September 27, 2022-a thawhhona thuthlung an ziah bawhzuiin meeting an nei a. He thutkhawmah hian Mizoram ah HIV/AIDS a darh zau tawhzia, mipui vantlangah a darh nasat tawhzia te sawilan a ni.
Thutkhawmah hian Mizoramah HIV/AIDS do zel dan tur leh mipui vantlangah tam zawka test kalpui theih dan tur te, NGO hrang hrang leh zirna in hrang hrangte nena thawhho theih dan tur te, raipuar HIV positive-te enkawl dan tur chungchangah AHF te nena thawhho theih dan turte an sawi ho a ni.
AIDS Healthcare Foundation ten Girls Act lama an hmalak dan chanchinte an sawi bakah, hmeichhe naupangte HIV laka an him dan tur leh hriselna leh zirna lama an changkan zel theih nana hmalak dan tur te pawh an sawi ho bawk.
He hunah hian AHF aiawhin Terri Ford, Chief of Global Advocacy, Policy & Marketing leh Lyle Honig, Chief Financial Officer, AHF & Bureau Chief India, Dr Sam Prasad, Country Program Director India Cares te an tel a. Minister hi Health Department atangin Dr Eric Zomawia, Mission Director, NHM, Dr Lily Chhakchhuak, Deputy Director & STO RCH leh Zoram Medical College atangin Dr Jane Ralte, Registrar, Dr Sangzuala, Assistant Professor te’n an tawiawm a ni.