Aizawl: Union Minister of State for Finance Dr Bhagwat Karad leh Chief Minister Zoramthanga te chu Inrinni khan Lengpui Airport terminal-ah an inkawm a, Mizoramaa hmalakna pawimawh chungchangte an sawi dun.
Chief minister hi Zirtawpni khan Guwahati-ah meeting pawimawhah telin Inrinni khan a lo let a, union minister hi Mamitah kalin, Delhi panin Inrinni vek khan Mizoram a chhuahsan.
Chief minister leh Dr. Karad chuan Mamit leh Mizoram puma mipui hriselna enkawlna chungchang te, ram hmasawnna leh health care a kal dun dan leh tihchangtlun zawk nan mamawhna te, Mizoram medical college neih chhun enkawl zui zel dan tur te, primary health centre-te tihchangtluna thuam that zel pawimawh a tih thu te an sawi.
Heng bakah hian Mizoram economy hmasawnna atana theihna a neih – leilung nghenga eizawnna chu a hlawkna tak tak haichhuah tur chuan a panna kawng link road tha a tul thu te an sawi dun bawk.