Premier League table-ah an la san viau chuan Krismas a la hla aniang tiin club dang fans ten an tih el thin. Mahse kumin Krismas a Premier League hma hruai tur chu Arsenal an ni.
Gunners hian point nga a hma hruai fal turin an hun remchang neih an chhawr a, Wolverhampton Wanderers lakah goal hnih khungin 2-0 in an chak. Lehlamah an elpui manchester City chu Brentford laka an muala an tlawm avangin kum 2007 hnua a vawikhatna atan Gunners in Krismas-ah hma an hruai dawn.
A chung berah Gunners
Molineux Stadium-ah table mawng lama awm, season harsa hmang mek Wolves lakah Arsenal in harsatna lian an tawk lo. Norwegian midfielder Martin Odegaard chuan second half minute 54-na leh 75-naah goal a khung.
Portuguese midfielder Fabio Vieira pawh a che tha a, hetihlai hian Wolves goalkeeper Jose Sa chuan Gabriel Martinelli goal khung tur a dansak tha hle.
Coach Mikel Arteta chuan an dinhmun tha chu an tam lawmna tur a nih thu a sawi a. “Tuman tuna kan awmna a kan awm hi an ring lova, min beisei sang lo. Mahse he dinhmun a awm hi a nuam a, player te pawhin nuam an ti tur a ni.”
“Team dang result khan nghawng a nei ngei ngei. He league hi chu inelna a san avangin team dang hi an en tel loh theih loh a, kha khan phurna a dik zawngin min pe.” tiin a sawi bawk.
England duh loh Toney
World Cup khel turin England in an ko lova, Ivan Toney-a’n a hna a thulh phah lo. Manchester City lakah goal hnih khungin Gareth Southgate leh a hote an la inchhir ang em tiin khelmual chhungah zawhna a zawt.
Etihad Stadium-ah Brentford in football huaisen an khel ngam. Huaisen taka nawr thinin minute 16-naah goal an khung a. Rico Henry tlanchak chhawrin Toney-a’n goal a thun.
Phil Foden chuan City tan halftime dawnah a sut a. Mahse minute 98-naah Josh Dasilva cross chu Toney bawkin chak nan a khung.
Inkhel dang
Inrinni zan Premier League inkhel dangah Liverpool in manager thar Nathan Jones hnuaia khel Southampton an mikhual a. 3-1 in an lo hneh.
Anfield-ah Reds tan Roberto Firmino chuan minute 6-naah goal khung mahse minute 9-naah Che Adams chuan a sut a. Striker Darwin Nunez-a’n Reds tan goal hnih a khung belh a, paruknaah an inhlangkai.
Tottenham Hotspur in an mualah Leeds United an mikhual a. Second half hmuhnawm takah 4-3 in an chak.
Spurs tan Harry Kane leh Ben Davies ten goal khat ve ve an khung a, Rodrigo Bentancur chuan goal hnih a khung.