Aizawl: Hachhek bialtu MLA Lalrindika Ralte-in Inrinni khan a bial chhung tlawhin Tumpangluia vantlang inkhawmah tun hnaiah mi dik duh chief minister duhtu tam takin Congress party an zawm tih a sawi.
Lalrindika Ralte hian tun hnaiah sorkar tha siam duh leh chief minister mi rinawm leh mi dik duhin Aizawl leh Mizoram hmun hrang hrangah Congress party zawmtu an pung zel niin a sawi a. Aizawl Municipal Corporation huam chhunga local council member-te pawhin tun hnaiah Congress an zawm thar a, vawiinah MNF atang bawkin VC an neih belh leh a, a lawmawm takmeuh tih a sawi a, hei hi bialtu MLA leh Congress party-ah beiseina mipuiin an neihzia lantirtu nia a hriat thu a sawi.
Mizoramin ni tinin sorkar tha siam turin hma lam a pan zel a, sorkar tha hi mi rethei hian an mamawh zual niin a sawi a. “Sorkar sum hi mipui kan awm avanga awm, mipui sum a ni a; chuvangin, sorkar sum duh duha hman hi mipuite hian kan haw hle tur a ni. Vawiina Congress party zawm thartute pawh hi ram leh hnam hmasawnna tura rinawm leh nghet taka dinga hnathawk turin kan lawmlut che u a ni,” a ti bawk.
Lalrindika Ralte hian Tumpanglui leh New Eden khawtlang mamawh chi hrang hrang bakah Kawrtethawveng khaw tan khaw chhung bawlhhlawh paihna tur motor, tractor tipping trailer leh VC House-a hman tur water cooler a hlan bawk.