Union Minister of Road Transport & National Highways Nitin Gadkari chuan Zirtawpni khan India hmarchhak state-te tana kawngpui siamna tur atana sum ruahman zat a puang a. Mizoram tan Rs, vaibelchhe 6,664 ruahman niin sum ruahman chan tam lamah parukna a ni.
Assam khawpui, Guwahati-ah Union Minister Gadkari kaihhruaiin hmarchhak state hrang hrang hruaituten hmarchhaka kawngpui siam hna thawh chungchang an thlir ho a. He hunah hian PWD changtu, Chief Minister Zoramthanga pawh a tel.
Gadkari-a’n hmarchhak state-te tana kawngpui siam tur sum ruahman zat a puan danin, Arunachal Pradesh-in Rs. vaibelchhe 44,000, Assam tan Rs. vaibelchhe 38,000, Manipura tan Rs. vaibelchhe 15,499, Meghalaya tan Rs. vaibelchhe 12,500, Tripura tan Rs. vaibelchhe 12,426, Mizoram tan Rs. vaibelchhe 6,664, Nagaland tan Rs. vaibelchhe 3,235 leh Sikkim tan Rs. vaibelchhe 2,000 te a ni.
Union minister-in Mizoram bik tana kawng siamna tur sum ruahman a nih tur thu a puanah hian kawngpui siam tur hi belhkhawmin km 204-a thui a ni a. Zorinpui-Longmasu inkar 2-lane kawng, km 28-a thui niin he kawng siamna atan Rs vaibelchhe 764 ruahman a ni a. Vairengte-Sairang inkar 4-lane (package 7&8), km 21-a thui niin kawng siam nan Rs vaibelchhe 1,400 ruahman a ni a. Leiverh telna tur Aizawl bypass road 2-lane, km 32-a thui siamna atan sum ruahman chu Rs vaibelchhe 3,000 a tling a. Seling-Tuivai inkar 2-lane kawng (Mizoram-Manipur ramri), km 122.5-a thui siamna tura sum ruahman chu Rs vaibelchhe 1,500 te an ni.
Thutkhawmah hian Mizorama NHIDCL-in kawngpui a siam mekte pawh sawi ho a ni a. Mizorama kawng siam hna thawk mek chu union minister hian tha a tih thu leh harsatna hrang hrang awmte ching fel turin theihtawp chhuah zel nise a ti.
Union minister hian chief minister hnenah hian thla hnih khat hnuah Mizoram lo kal a tum thu hrilhin, lei pahnih dawhna tur dilna awm mek pawh phalna pek a nih thuai tur thu a hrilh niin sorkar thuchhuah chuan a tar lang.