Iranian pa, Paris thlawhna tumhmuna kum 18 zet cheng tawh chu a thi.
Mehran Karimi Nasseri-a hi tumhmunah hian man a nih hnuah Roissy Charles de Gaulle tumhmunah hian kum 1988 atang khan a cheng ta ngar ngar a ni.
Kum 2004-a film siam, Tom Hanks-a channa, The Terminal pawh kha ama nun behchhan deuhva siam a ni.
Nasseri-a hi France rama chen phalna pek a ni a; mahse, kar rei vak lo liam taah khan tumhmunah bawk hian a kir leh a, natna bik em em pawh nei lovin a thi ta tih tumhmun thuneitu pakhat chuan AFP hnenah a sawi.
Kum 1945-a Iran-a Khuzestan province-a piang, Nasseri hi a nu zawng turin Europe-ah hian a kal a ni.
Belgium-ah kum eng emaw zat a awm hmasa a, pem lehkha mumal a neih loh avangin UK, Netherlands leh Germany-ah te um chhuah a ni tawh a. France a thlen hnuah tumhmunah hian 2F Terminal chu a in atan a hmang zui ta a ni.
Bungraw nawr tawlhnain a hual vel thutthleng karah a bungrua tlem nen a khawsa mai a. A dam chhung hun tam zawk hi note bu-a a chanchin ziah nan leh chanchinbu leh lehkhabu chhiar nan a hmang.
A chanchin hi chanchinbumiten an ngaihvenin Stephen Spielberg-a’n a hmuh fuh takah chuan The Terminal a siam phah ta a, Hanks leh Catherine Zeta-Jones an chang.
Film chhuah hnuah hian chanchinbumi tam takin amah biak tumin an pan a. Nazzeri-a hi ‘Sir Alfred’ tiin amahin a insawi mai thin a, ni khatah vawi rukte miin an kawm thin niin Le Parisien chuan a tar lang.
Raltlan ni mah se kum 1999 khan France-a chen phalna pek a ni a, kum 2006 thleng tumhmunah a cheng a, a damloh avangin damdawi inah dah luh a ni a. Film atanga a pawisa hmuh hmangin khualbukah a cheng zui niin French chanchinbu, Libération chuan a tar lang.
Chawlhkar tam pawh la liam lovah khan Nasseri-a hi tumhmunah bawk a let leh a, a thih thlengin a awm ta a ni tih tumhmun thuneitu pakhatin a sawi.
Euro sang chuang fe a lo kawl niin a sawi bawk.