Ramri chungchanga state pahnih aiawhte inbe tura ruahmanna hmasaah Mizoram aiawhte an rem loh avanga thulh a nih hnuah November 17, 2022-ah Guwahati-ah inbiak a ni leh dawn.
Mizoram leh Assam sorkar aiawhte chu a tum thumna atan November 4 khan inbe tura ruahmanna siam a ni a. Mizoramah India president a zin avang leh inbiaknaa tel tur minister pakhat a zin avangin Mizoram sorkarin inbiak hun chu sawn an rawt a, an rawtna angin kalpui ni lo mah se November 17-ah inbiak a ni leh dawn.
Home department hotuten an sawi danin, inbiaknaah hian Mizoram sorkar aiawhin Home Minister Lalchamliana, Minister of State Lalruatkima leh home department hotute an tel dawn a, November 16-ah sorkar official-te ve ve an indawr phawt ang a, ni 17-ah minister-te an inbe thung ang.
Ramri chungchanga inbiak tur atan hian Mizoram sorkar chu a inbuatsaih mek a, home department hotuten an sawi danin, Mizoram aiawhte hian Mizoram dinna chu Bengal Eastern Frontier Regulation, 1875 a nih thu leh Mizoramin hemi a pawm chhan te, a dang a pawm loh chhan te an sawi dawn a, chuta tana tanchhan tur hrang hrang pawh dapkhawmin an inbuatsaih mek a ni.