2022 FIFA World Cup inkhel hmasa ber an tihchhuah (broadcast)-ah fiah tawk lo a tam em avanga miin an sawisel karah Indian app chuan ngaihdam a dil.
Reliance Jio chuan khawvela infiamna inkhawmpui lian hi India rama livestream-a pe chhuak turin phalna a nei.
Company hian man chawi ngai lovin an Jio Cinema app hmang bakah an website atanga en theih turin a pe chhuak.
Inkhel hmasa ber an tihchhuahah erawh a entute an lungawi lo hle a, soial media-ah an phun nasa.
Tournament hi Pathianni zan khan Al-Bayt Stadium, Qatar-ah hawn a ni a, inkhel a awm nghal.
Inkhel hmasa ber hi a thlengtu, Qatar leh Ecuador an ni a, entu tam tak chuan livestream-a tihchhuah chu a fiah lovin buai a tam hle niin an sawi.
Indian billionaire Mukesh Ambani-a ta, Jio Cinema chuan entute hnenah rang takin ngaihdam a dil nghal a, an thil en fiah loh chungchangah entute chu an app tithar (upgrade) turin an ngen bawk.
“Tha taka in chhim theih nan kan thawk zel a, FIFA World Cup Qatar 2022 fiah taka in en theih nan khawngaihin in app lo upgrade ula, a fel lo awmah ngaihdam kan dil,” tiin Jio Cinema chuan Twitter-ah an tar lang.
Hei hi inkhel en laia an thuchhuah a ni a; mahse, entu tam tak chuan inkhel tluanin a fiahin an en thei mang chuang lo.
Twitter-a phun an tam hle hnuah Jio Cinema hian boruak tihzangkhai nan TikTok app-a meme an dah chhuah phah hial.
An thil tih chuan fan-te lung erawh a tiawi zo chuang lo.
“Streaming a chhe tak zet a, kumin FIFA world cup-a goal hmasa ber pahnih chu ka en ta lo,” tiin mi pakhat chuan a tar lang a, “A pawi tak zet a ni,” a ti bawk.
Mi thenkhat chuan tihchhuah phalna nei ve tura bei turin hetiang ti thin company-te an ngen hial a. Mi thenkhat erawh chuan app-in buaina a tawh chu a fel mai an beisei thu an sawi hlawm bawk.