Aizawl : Mizoram University Central Library-in nimin khan Ruby Jubilee (kum 40-na) an lawm. Mizoram University Central Library hi kum 2020 khan kum 40 tling tawh mahse, COVID19 avanga an lawm theih tak loh avangin an kum 42 tlin champha nimin khan Ruby Jubilee hi an lawm a ni.
MZU Central Library Ruby Jubilee lawmnaah hian MZU Vice Chancellor lo ni tawh thin Prof. R. Lalthantluanga leh Prof. Darchhawna (Padma Shri) te bakah retired professor dangte pawh an tel a. Librarian Dr. Lalremsiami’n kum 1980-a MZU Library indin chhoh dan leh hmasawnna hrang hrang an neih dan te a sawi.
Ruby Jubilee lawmnaa khuallian MZU Vice Chancellor (Acting) Prof. Pravakar Rath-a’n Central Library-a thawkte a lawmpui thu sawiin, an kal zelna turah duhsakna a hlan a. MZU Registrar Prof. Lalnundanga’n MZU Central Library Ruby Jubilee Souvenir a tlangzarh bawk.