Australia-a Sydney khawpuiah primary school pakhata classroom science experiment an neih laia thil kal sual palh a awm avangin zirlai eng emaw zatin hliam an tuar.
Naupang pahnih chu an kan nasat avangin ambulance-in damdawi inah hruai an ni a, mi dang pakua pawh an kang a, anni erawh an kang nasa lo hlauh nia sawi a ni.
Experiment an tihnaah hian sodium bicarbonate leh methylated spirit an hmang tel niin 9news chuan a tar lang.
A hmunah hian helicopter, paramedic leh fire truck pawh an thleng nghal thuai.
He thil hi Manly West Public School-a Thawhtanni chhun dar 1:00 (India-a zing dar 7:30) vela thleng a ni.
New South Wales Ambulance Acting Superintendent Phil Templemen chuan thli thawin experiment an nei lai hi tibuaiin bawlhlo an hman thenkhat chu a puak ta niin a sawi.
Naupangte hi kum 10 leh 11 inkar vel an ni a, an hmai, awm, dul hnuai lam leh an ke a kang hlawm niin Sydney Morning Herald (SMH) chuan a tar lang.
Zirtirtu pakhatin hliam tenau a tuar bawk.
Nu leh pa tam takin sikul hi an thleng nghal a, experiment chu engvanga nei nge tih an zawt a; mahse, sikul chuan ‘engkim thunun tawh’ a nih thuin an chhang.
“Online atanga thil thleng hi hriain kan mangan hman hle a; mahse, rang taka thunun fel a ni tih kan hria,” tiin pa pakhat, Mich Ashton chuan a sawi.
Pakhat dang chuan tih dan thin pangngaia science experiment ti an nih thu leh zirtirtu pawh a demawm loh thu a sawi.