Ruihhlo ngawt a ni tawh lo, Smuggling hrim hrim do a hun
Kan ram dinhmun hi uluk taka han ngaihtuah chuan kan dinhmun that lohzia hi a chiang khawp mai. Social media leh kan print media a kan hmuh zawng zawng hi hma lam êng panna aiin hmun thim pan kan ang ta. Khawvel ram tam tak tlakchhiatpui smuggling leh corruption in kil tin a hrut a. Kan sawrkar lah chuan tih ngaihna a hre lo nge a tel ve tih pawh a thliar hran hleih theih loh chu a ni a.
Khawvel ram nuam an sawi hian eirukna leh sumdawnna dik lo in a chim ve loh a ni thin. Keini ram pawh hi ram nuam leh zalen, mihring sualna chi hrang hrangin a hrut tam loh, peaceful state tih kha kan ni thin a. Mahse tunhnai chho a kan chanchin hriat hi chu a rapthlak ta lutuk a. Ruihhlo ngai ram, ruihhlo tawlhrukna kawngpui, sawrkar phal loh thil chi hrang hrang tunhmaa kan hriat ngai loh tawlhrukna, chung thil avanga mi thenkhat lo hausak thut thutna kan ni chho ta! Khawvel ram muanawm loh ber pawl Columbia leh Latin America kalphung kan zawh zel niin a lang.
Hei hi kan kawng zawh mek a nih chuan kan ram hi hmalam boruak chhe takin min hmuak a. Hengah hian engtia hma lak tur nge ni ta ang? A bul berah chuan kan sawrkar hi a chet vat vat a ngai. Kan sawrkar hian smuggling lam bei let tur hian mipuite tawiawmna ngenin police force te rang taka a chet chhuahtir a, ruahmanna fel tak nen a chet rum rum a ngai ta a ni. Ram a chhiat chuan a tuartu chu mipui tho kan nih avangin mipui pawhin huaisen taka smuggling kan do a, sawrkar tawiawmtu, ram hmangaihtu tak tak, ram neitu kan nih i hre bawk ang u.