Brazil tan World Cup qualifying a che tha, striker a an rinrawl Richarlison bawk a hun takah a par vul a. Serbia tang khawng tlat lakah goal pawimawh vawi hnih khungin 2-0 in Brazil in hnehna an chang.
Lusail Iconic Stadium-ah Brazil in goal khung tura an nghah rei a ngai. Serbia in tlarhnung nghet takin an rem a, pumraw lian zawk leh thahrui ngah zawk an nihna chu an chhawr tangkai.
Minute 62-naah an mamawh goal erawh Seleção in an khung. Vinicius Junior ball pet chu Serbia goalkeeper Vanja Milinkovic-Savic chuan a dang per a. Hei hi Tottenham striker Richarlison-a’n lo nang fuhin laklawh awm miah lovin goal-ah a khung.
Minute 11 hnuah Richarlison-a hun ropui a thleng. Vinicius-a ball siamsak chu a tirah la fuh chiah lo mahse rang taka insiamrem in boruakah invawrh kang chungin goal mawi a hlap lut.
Serbia in goal ven an dah pawimawh a, Brazil chu team hlauhawm zawkah an tang fo. Alex Sandro leh Casemiro ten goal ban an pet per a. Fred-a goal khung tur Milinkovic-Savic chuan a dansak a tha hle.
Brazil in an match hmasa berah fiahna an paltlang a, second half a Gabriel Jesus, Antony leh Gabriel Martinelli te an la dah lut theiin an squad chhahzia a tilang. Hetihlai hian an star player Neymar erawh inhliam avanga lakchhuah a ngai.
Portugal chak zo lo teuh
An player zinga lar ber in record thar a siam a. Goal thum an khung bawk. Mahse Ghana lakah rinkai Portugal an chesual teuh.
Kum 37 mi Cristiano Ronaldo in FIFA World Cup tum nga a goal khung vek thei awmchhun a nih zanah 3-2 in Ghana an hneh.
First half a chelh an nih hnuah Southampton defender Mohammed Salisu chuan Ronaldo ti tlu in penalty a chawi a. Ronaldo-a’n a pet goal.
Ghana in Andre Ayew hmanga an sut hnuah Bruno Fernandes ball siamsak tha atangin Joao Felix chuan goal-ah a khung a. Fernandes-a ball siamsak atang bawkin Rafael Leao chuan an goal thumna a khung.
Osman Bukhari chuan huntawp dawn lamah goal khat Ghana tan a tauh lut a. Portugal goalkeeper Diogo Costa chesual teuhin Inaki Williams chuan huntawp hma in an si phurh a sut teuh hle.
Group H inkhel dangah Uruguay leh South Korea an inhnehtawk avangin Portugal hi an sang ber mek.