Kuki-Chin National Army leh Bangladesh Army te inkah avanga Bangladesh aṭanga Zohnah- thlak Mizorama raltlan tlan te lo tuamhlawm dan leh enkawl zui dan tur ngaihtuahin nimin khan Lawngtlai Bawrhsap Amol Srivastava hovin a kaihhnawih mipawimawhte Lawngtlaiah an thukhawm.
Lawngtlai Bawrhsap chuan Bangladesh aṭanga raltlan lo lutte chu an chanchin hriat a nih veleh District administration aṭanga a ṭul ang ang buaipuiin, anmahni chhawmdawlna tur ngaihtuah nghal a nih thu a sawi a. Sorkar lam aṭangin theihtawpa ngaihven zui zel an nih thu a sawi.
An sahimna zawnga Mizorama lutte chu a hnam ang zawnga lo thliar lova, mahni mihringpui harsatna tawkte ṭanpui duhna rilru aṭanga lo dawnsawn a pawimawh thu Lawngtlai Bawrhsap chuan a sawi a. District administration leh raltlan chhawmdawl kawnga hmalatu pawl hrang hrangte inkarah inhriatpawhna ṭha a awma, felfai zawka hmalak a nih theih nan ṭhutkhawm chu buatsaih a nih thu Bawrhsap chuan sawiin, pawl, kohhran leh mimal anga raltlante chhawmdawlna kawnga hmalatu zawng zawng chungah lawmthu a sawi bawk.
Raltlan chungchanga Nodal officer, Lawngtlai sub-divisional officer (Sadar) TT Beikhaizi chuan Lawngtlai district chhunga Bangladesh aṭanga raltlan lut te dinhmun tlangpui leh District administration aṭanga chhawmdawlna an pek tawh dan te a sawi a. State sorkar lama mamawh hrang hrang an thlen belh thu a sawi.
Central Young Lai Association (CYLA), Bawm Students’ Association (BSA), Pang Zirlai Pawl (PZP) leh Central Young Chakma Association (CYCA) hruaitu ten Bangladesh aṭanga raltlan lo lut an lo buaipui tawh dan leh chhaw- mdawlna kawnga hma an lak dan te an report bawk a. Lawngtlai district-a Bangladesh aṭanga raltlan awm mekte leh lo la thlen belh turte chhawmdawl leh enkawl zui dan turte an sawi ho bawk.
Thuneitute’n an chhinchhiah danin, nimin thleng khan Lawngtlai District chhungah Bangladesh aṭanga raltlan lut mi 293 (mipa 132 leh hmeichhia 161) an awm tawh a. An zinga mi 145 chu kum 18 chung lam niin, kum 18 hnuai lam mi 148 an awm. Raltlante hi Parva-III-ah community hall, primary school, health sub-centre, anganwadi centre leh high school building-ah te riahna leh khawsakna tur ruahmansak lailawk an ni.