All India Football Federation President Kalyan Chaubey chu Mizoram Premier League Season 9 final inkhel en tur leh Mizoram Football Association hruaitute nena inkawm turin December 6 hian a lo zin dâwn.
MPL Final hi December 6 zan dár 7:45-ah Rajiv Gandhi Stadium, Mualpuia khelh tura ruahman a ni a, FC Venghnuai leh Chawnpui FC an inhmachhawn ang.
AIFF President lo zin tur chungchang leh thil pawimawh dangte ngaihtuahin Thawhlehni khan MFA Executive Committee meeting chu MFA Office-ah an nei.
MFA chuan AIFF President lo zin tur hi lawmawm a ti a, District Football Association hruaitute nen tha taka lo dawnsawn a hun hlawk tâk hman ni se, tiin a rel a; Kalyan Chaubey hian sorkar hruaitute pawh a kawm ang.
Tata Football Academy chhuak, India tán pawha football lo khel tawh thin Kalyan Chaubey hi footballer hlui AIFF President hmasa ber ni turin September 2, 2022 khan thlan tlin a ni.
Mizoram Football Association chuan December 6 zana MPL9 final en tur leh, Rajiv Gandhi Stadium-a AIFF President läwm turin Mizo mipuite a sawm.