Karnataka-a college professor pakhat chu Muslim zirlai hming a hriat ruala mi firfiak nena thuhmun reng anga sawia puh a nih avangin class la thei rih lo tura hrem a ni.
Zirlaiin hetianga an zirtirtuin a ti a duh loh a lantir lai video chu darhin social media-ah nasa taka thehdarh zui a ni.
College chuan Thawhtanni khan thuchhuah siamin thil thleng hi an chhui dawn thu an sawi.
Professor thil sawi hi social media-ah chuan demna thawm a ring hle.
Manipal Institute of Technology, Udupi district-a professor hian zirlai pakhat chu a hming a zawt a, a hrilh hnuah, “Aw… Kasab-a ang bawk i nih chu,” tiin a sawi zui tih NDTV news channel chuan a tar lang.
Ajmal Kasab-a hi November 26, 2008-a India sumdawnna khawpui, Mumbai beih a nih tuma a beitu mi firfiak dam chhuak awm chhun kha a ni a. Thiam loh chantir niin kum 2012 khan khai hlum a ni.
Kasab-a hi Pakistani mi firfiak, darkar 60 vel zet Mumbai khawpui thununtu zinga mi niin railway station lar leh liam, khualbuk changkang leh Jewish cultural centre an bei a. Mi 166 thiin an zingah hian police pawh thahnem tak an tel.
Online-a thehdarh, second 45 awh video-ah hian zirlai hian an professor hi chhangin a hming leh Kasab-a khaikhin chu ‘a nuihzatthlak loh’ tih a sawi.
“He rama Muslim ni leh ni tina hetiang tawn hi a nuihzatthlak miah loh,” a ti.
Professor pawh hian ngaihdam a dil nghal tho va, ‘ka fapa ang tho i ni’ tiin a sawi a; mahse, hei hian zirlai hi a tilawm zo tawh chuang lo va, ngaihdam a dilna chuan ‘i ngaihdan a thlak chuang lo’ a ti let leh a ni.
Twitter hmangtu tam tak chuan professor an demna thu an sawi chhuak a, inthliarna awm tha an tih loh thu leh India-a sakhaw zuitu tlem zawk, Muslim-ten hetiang kaihhnawih ni tin an tawng reng chu a tha lo tak zet tih an sawi hlawm.
Mi thiam leh chik mite chuan kum 2014-a Prime Minister Narendra Modi-a kaihhruai sorkar a din hnua tlawm zawkte hmuhsitna hi a lar thar hle tih an sawi a. Mi thenkhat chuan zirlaiin a zahawmna humna tura huai taka an zirtirtu a chhang ngam chu an fak bawk.
Zirna in hian Thawhtannia thuchhuah an siamah an chhui zui nghal thu an tar lang a, professor pawh ‘chhui hna zawh fel a nih hma chu zirtirna pe thei lo tura tih a ni’ tih an tar lang.
Thuchhuahah hian zirna in huam chhungah inthliarna a awm tur a nih loh thu ta langin mi tin ang khatin, ‘hnam, chi, sakhua, hmeichhia leh mipa’ an nihnaah en hranna a awm thiang lo tih an tar lang.
University-a public relations officer chuan Scroll news website hnenah ‘thil thleng kha a vanduaithlak a, zirna in pawhin na takin a dem’ tiin a sawi.