Aizawl: Faina beihpui thlakna, ‘Swachhata Hi Seva 2022’ denchhena buatsaih Aizawl district-a khaw fai thlanna result chu nimin khan PHE department Conference Hall, Tuikual South-ah puan a ni a, Maubuang khua chu khaw fai berah thlan a ni.
Khawfai thlan chhuahte chu pakhatna – Maubuang, pahnihna – Sailam, pathumna – Sailutar an ni a, Sawleng leh Muthi ten consolation prize an dawng a, lawmman atan hian chawimawina thuziak leh sumfai hlan an ni.
He hun hmanpuitu, Aizawl district bawrhsap Dr Lalhriatzuali Ralte chuan hman khat daih plastic khap a nih tawh thu leh sorkar laipui lam atanga kengkawhtu, National Green Tribunal an khauh sawt thu sawiin, tih tur an rawn tukte an zawm that a ngai tawh hle a, uluk taka an rawn vil zui reng avangin a zawm tha lo state-te chu an hrem thin a, he hman khat daih plastic hi ram leilung tan a that loh bawk si avangin hman loh mai piah lamah midangte hrilh hriaa zirtirtu nih a tul thu a sawi a, Krismas leh kumthar ruai buaipuitute pawhin hei hi ngai pawimawh a, a thlakna tur an ngaihtuah a ngai tih a sawi.
PHE department-a PMU Director H. Duhkima pawh thu sawiin fai hi a pawimawhzia leh fai tura kan tih turte mi dangte zirtir thei turin mahni kan fai a tul a ni, a ti a. “In chhunga kan faina hian khawlai thleng se, inchhung kan tihfai uluk ang bawkin khawlai tibawlhhlawhtu nih loh i tum theuh ang u,” tiin, kalkhawmte a chah a ni.