Aizawl : Zo Re-Unification Organisation (ZORO)-in Mizoram district ṭhenkhatah Bawrhsap thupekin BDO ten chhiarpui mak tak kalpui turin an huam chhung khaw hrang hrang VC te an hriattir tih sawiin, he thupek hi ennawna siamtha tura sorkar an ngen thu an sawi.
ZORO chuan BDO pakhatin a huam chhung khaw hrang hranga VC te he chhiarpui chungchanga a hriattirnaa a tarlan danin, he chhiarpuia chhinchhiah tura tih te chu – 1. Man (Tai spea- king); 2. Garo; 3. Khasi – Jaintia; 4. Hajong; 5. Naga & Dimasa; 6. Chorei; 7. Simte; 8. Zou; 9. Zomi; 10. Neihsial; 11. Ranglong; 12. Thado te an nih thu an sawi a. No. 6 atanga 12 te chu Zohnahthlak vek an nih thu sawiin, Zohnahthlakte a hrana chhinchhiah tum an nih chhan chu sawifiah turin Mizoram sorkar an ngen.
Zohnahthlakte a hrana chhinchhiah tum an ni chu ngaihṭhatthlakloh hlea an hriat thu ZORO chuan an sawi a. “Zohnahthlak, kan unau, Mizoram chhunga chengte enhran an ni hi ṭha lo kan ti takzet a ni” tiin, he chhiarpui chungchang hi ennawna siamtha leh turin sorkar an ngen a ni.