Ruihhlo do kawnga department leh pawl hrang hrang khaikhawmtu, State Level Narcotics Coordination Centre (NCORD) chu Chief Minister Zoramthanga hovin nimin khan an thukhawm a, Mizoram chhunga ruihhlo hluar chho ta lutuk leh a nghawng hrang hrangte sawihoin hmalak dan tur an rel.
Thutkhawm kaihruaitu, Zoramthanga chuan Mizoram chu ram dang depa awm, ruihhlo tawlhna kawng a nih avangin ram leh mipui tan ngawrh taka tha thlah lova a do hna an thawhho a ngaih thu a sawi a, ruihhlo do kawngah harsatna hrang hrang awm mah se mawhphurtu department leh pawlten an zawn theuha hna awm chu theihtawp chhuaha thahnemngai taka hma an lak hmasak phawt a tul thu a sawi.
Chief minister chuan a bik takin zirna inah ruihhlo that lohzia inzirtirna kalpui chhunzawm zel a that thu a sawi a, ruihhlo tawlh do kawngah pawh intelligence system tha zawk neiin, sorkar leh tlawmngai pawl leh mipui thawhhona tha tak nen tha thlah lova hma lak tul a tih thu a sawi a ni.
NCORD thutkhawmah hian Narcotics Control Bureau, Mizoram Police, Excise & Narcotics Department, Social Welfare & Tribal Affairs Department leh Assam Rifles ten an hmalakna theuh presentation an pe a, thurel tura chhawp chhuah hrang hrang – inzirtirna leh hrilhhriatna kalpui zel chungchang te, training pek te, Narcotics Control Scheme leh National Fund for Control of Drugs Abuse (NFCDA) atanga sum hmuh hman dan vil leh a dangte sawiho a ni.
Thutkhawmah hian Chief Secretary Dr. Renu Sharma leh DGP Devesh Chandra Srivastva te chuan thu an sawi a, Social Welfare & Tribal Development Department-in zirna in 122-a zirlai 10,773 atanga drug survey an neih chungchang leh hmalakna dangte report an pe bawk.