- Reuben Lalnunthara Hnamte
Christmas hi chuan alo thlen dawn hnaih hi chuan lung hi a ti leng raih mai a. Mitinte kan phur a, a hun lo thleng tur atan kan theih ang tawk tawkin kan inbuatsaih map map thin. Sumdawng tin mai an hlawk emaw tih tur a ni a, Christmas nena inkaihhnawih lem lo anga kan hriat thleng hian Masi dawnah hi chuan an hlawk vek emaw tih tur a ni a. Kan naupan laia masi kan nghahhlelh thin zia te kha, tunlaiah chuan khatiang em em khan naupangte hian an nghakhlel tawh angem maw. Christmas ruaithehna tur hnah han lakte, thing han phurhte kha ava nuam thin em! Kan changkang tulh tulha a nuam lo ta zawk mah te hian ka hria. Mawl deuh lai huna kan theih ang tawk tawka kan lo inbuatsaih ve thin te kha a ngaihawm zamah ta zawk a ni.
Khawpuiah te phei hi chuan hnaha ruai han theh te a lo buaithlak tawh a, dispo thleng te kan han hmang ta a, a masi ta lo riau te hian ka hre thin. Har mei han khuk laih laih a, thingtuah ngeia ruai tur han chhum te, hnah nen ngeia ruai han thehte kha a masi bik riau te hian ka hre ve thin. Christmas ruaitheh ni a vawk an han talha, vawkphing inchuh reng renga naupang ho kan ri ve laih laih thin te kha a ngaihawm ta. Christmas ni a, kan thawmhnawm thar neih ve chhun nen mawi inti em em a inchei a, Kep silai kan han kap thang thang a, halpuahte a malin kan han halpuak ve thang thang thin laite kha hmanlai an chang zo ta a ni. Tunah zawng kan boruakin a zirloh avangin khapte a tam ta a, hmanlai ang kha chuan thil a tihtheih ta loh.
Chutih rualin kan Christmas hmuah dan leh hman dan hi a dik tawk em tih chu ringtute hian kanin enlet a pawimawh hle mai. Kan hmuah dan tha tawk lo, kan chin thante I han sawi zau teh ang.
Nawmchen nan kan hmang : Ringtuten kan tiha mawilo leh kan chin fo thin chu kan Christmas te nawmchen nana hman kan tum tlat hi a ni. Zu leh ruihhlo tih nan te, hmeichhiat mipat lam uar nan te, a nuam theih ang bera sum khawhral tur a nawmchen nan kan hmang emaw tih tur a ni ta. Vai ho puja iangin kan hmang a ni ta ber mai. Tam tak chuan enge Christmas kan hman chhan leh kan hmana ber pawh hre fumfe lo pawh kan kat nawk mahthei a ni. Zu in ngailo lovin an in thar a, drugs ti ngailo ten an ti thar bawk a. Hmeichhiat mipat lam ti ngailo ten an tithar emaw tih mai tur a ni thin. Heng te hi Kan tana Lal Isua lokal chhan leh khawvela a lo pian chhan nen chuan thil inmillo tak a ni. Amah chibai buka. atana inserh thianghlim tur ni zawk awm tak hi kan ni a. Kan hman thin dan hi chu a letling hle. Tam tak hi chuan Puja ang chauha kan chan a ni ber. Heng te hi ringtu leh Kristian ram intite tan chuan sim daih chi a ni tawh a ni.
Inngaihzawn nan kan hmang : Christmas hi inngaizawng ngailo ten inngaihzawn tharna hunah kan hmang emaw tih theih tur a ni. Inngaihzawnna thianghlim ni lem lo, tisa chakna nphuhrukna hun a tan kan hmang emaw tih mai tur a ni. Hetiang hi nula tlangval tam takin ngei ngei tura kan ngaih hi kan sim a pawimawh hle mai. Christmas hi HIV inkai darhna hun atan te, sawn paina hun atan te, sual ti ngailo ten sual tih nan kan hmang thin hi a pawi em em a ni. Christmas kan hman chhan leh a tum nen hian a inanglo lutuk hi inngaihtuah chian a hun khawp mai. Christmas hun atanga sual khur thuk taka pil ta, hmeichhiat mipatna lama harhthar ta, zu leh ruihhlo lama harhthar ta riau te kan ni thin hi a pawi hle a ni. Kan ram hian a chhiatphah a, kan thalaiten an chhiatphah bawk a. Khawtlang leh kohhrante, nula pa te pawh hian heng thilte hi kan chik ve a pawimawh hle. Thil tamtak chu siamtha vek theilo mah ila, siamthat theih chin chu kan neih ngei a rinawm.
Midangte tana luanchhuahna : Thalai leh nu leh pa te, naupangte thlengin thenkhat chuan he Christmas hi midangte tana thiltha tih nan, luanchhuah nan an hmang thin hi a ropui thin ngawt mai. Lal Isua chuan “ Heng mite berte chung ti chu ka chunga ti in ni..” a tih kha tam tak chuan an tihlawhtling a ni. Midangte tana luanchhuah nan leh, midangte tana thiltha tih nan he kan hunpui hi I hmang hram ang u. Christmas hmanna tur nei ve lo te, lusun avanga khawhar tak te, lungngaia kun mekte tan nu leh pa ni turin kan theihna te hmang ila, kan inchhir hauh lovang.
Remna siamtu nih tum ila: Lal Isua chu remna Lal tih a nih angin leh, kan Biblein ‘ lei chunga a lawm em em mihringte hnenah remthu leng rawh se ‘ a lo tih angin midangte nena inremna a tan te, chhungkua inrem tawh lote inrem thar nan te, thenawm khawveng in hmuthiam lo te inrem nan te hmang thei ila; mi kan huat leh kan rem theih hauh lo te remna hun a tan te hmang ila kan Christmas chu ava hlawhtling dawn em!
Chhiartu zawng zawngte Christmas chibai ka buk vek che u a. Hlimtaka hmang turin duhsakna ka hlan vek che u a ni. Kan hla chuan ‘Thinlung alamah hawn ila, ro thildang angai tawh lo’ a tih hi changvawnah I nei vek ila, he hunpui kan lo thlen dawn hian midangte tana malsawmna nih I tum theuh ang u. Thlarau lama malsawmna kan dawnna hun lo ni theuh se, thlarau thianghlim chuan min chhungkhat theuh rawh se. Amen