Kum 2014-a nationalist Prime Minister Narendra Modi-a’n thuneihna a chan atang khan Gandhi-a hi BJP leh an thil kalpui (ideology) sawiseltu langsar niin Modi-a pawl tela member maktaduai tel nei, Hindu pawl, Rashtriya Swayamsevak Sangh (RSS) chu a bei nasa hle bawk.
Kum 1925-a a din, RSS hian BJP hi an political wing ang deuh a ni a, India chu Hindu rama siam an tum a. Mi thenkhat phei chuan India Muslim maktaduai 200 vel awm mek chu second-class citizen-a chhuah an tum niin an sawi hial.
Gandhi-a hian kawng a zawhnaah hian hei hi a aupui nasa hle a. “He kawng zawhin a tum chu BJP leh RSS ten thu huatthlala leh tharum an thehdarh hmehmih a ni,” tiin BJP rorelna, Karnataka-a luha thu a sawi hmasak berah a sawi a. Karnataka hi mi tam tak chuan India chhim lam puala Hindu chawivawng duhna leh tumna, ‘Hindutva’ an tih piantirna hmun niin an sawi.
“Kanyakumari atanga Kashmir thleng kawng zawh a ni ang ang a, ruah, khaw lum, vawt, thlipui leh thil dang engmahin a dang dawn lo va, lui angin a kal zel ang. He kawng zawhah hian thu huatthlala emaw, tharum thawhna hmuh tur a awm dawn lo va, hmangaihna leh inunauna chauh hmuh a ni ang. Chu chu India chanchin a ni a, a DNA pawh a ni bawk,” a ti.
Congress leader hruaitu hian thil dang, hna nei lo tam leh thil man sang lutukte a aupui bawk a. BJP chuan mi hausa tawntaw (billionaire) tlem vulh lianin India-a mi tam zawkte chu rethei takin an la siam reng niin a puh a ni.