India-a eptu party lian ber hruaitu, Rahul Gandhi chuan ram pum huapa ‘inpumkhatna kawng zawh’ a kalpui mek chu a tum chin zahve a thleng ta.
Thawhlehni kha a ni 80-na niin India lailia Madhya Pradesh a thleng.
‘Bharat Jodo Yatra’ (Unite India March) hi India chhim tawp, Tamil Nadu-a Kanyakumari atanga September 7-a tanin km 3,500 chuang kea kalin India-in a awp chin Kashmir-ah tawp a tum a, ni 70 a la kal dawn a ni.
Nehru-Gandhi chhungkaw kal zela mi, kum 52 mi, Gandhi-a hi a pa, Rajiv Gandhi, a pi Indira Gandhi leh a pu, Jawaharlal Nehru te chu prime minister lo ni tawh an ni hlawm a. Tunah hian ani hi MP ni mekin Indian National Congress party president hlui a ni.
‘Unity march’ a tan atangin Gandhi-a hi ni tin km 20 vel kal ziah ang a ni a, mi 100 chuangin zuiin a thlen chin apianga mipui sang tam takin an lo hmuak zel bawk.
Madhya Pradesh bikah hian a farnu, Priyanka Gandhi-Vadra chuan a lo zawm dawn a, ni hi Congress party tana campaigner langsar ber pakhat a ni ve mek.
Activist, mi thiam leh lemchan thiam eng emaw zatin chhim lam state pali – Kerala, Tamil Nadu, Karnataka leh Andhra Pradesh leh khawthlang lama Maharashtra a kaltlang chhungin an lo tawiawm tawh a, a kawng zawhnaah an zui thin a. Madhya Pradesh hi kartawpah khan a lut tan a ni.