World Cup Group B chinfel a ni a. United States Men’s National Team chuan hnehna chan an mamawhna inkhelah 1-0 in an khingpui an hneh a. Round of 16 lutin Netherlands nen an inkhel ang.
Thawhlehni zana Al Thumama Stadium a inkhelah Iran leh USA an inkhel a, American hovin knockout stage thleng turin chak ngei an mamawh.
Inkhel a goal awmchhun hi an star player Chelsea forward Christian Pulisic khung a ni a. AC Milan defender Sergino Dest ball tauh chu goal-ah a ti lut.
Goal a khungna lamah hian Iran goalkeeper Alireza Beiranvand nen an insu a. Hun engemaw chen buaipui a ngaih hnuah khelmual chhuahsan theiin halftime zawhah khelmual a lut leh tawh lo.
Ram pahnih tana inkhel pawimawhah Iran in draw result chauh an mamawh tawh avangin USA ven an ngai pawimawh a, goal hlauhawm an siam tam lo.
US in first half a goal an khung hnuah second half-ah an insiksawi a, Saman Ghoddos leh Saeid Ezatolahi ten goal chung chiahah chance an neih an kal tir ve ve a. Morteza Pouraliganji pawhin freekick atanga a ball hmuh a tauh lut teuh.
Huntawp hma in Mehdi Taremi chuan penalty beiseina a nei a, mahse pek a ni lo bawk.
Lions chakna Marcus
June thla khan England team pawh ni lo, a club a dinhmun a chiang lo. Nimahsela December thla kai meuh chuan England in tlarhma a an thlan hmasak ber zingah a tel tawh dawn.
Marcus Rashford-a’n a chetthat a chhunzawm a, England tan Wales lakah goal tha vawi hnih khungin 3-0 in an ram a chakpui.
Ahmad bin Ali Stadium Wales in England an hneh a, inkhel lehlamah chak zawk an awm loh bawk chuan an tling dawn a. Mahse kawng engkimah an khingpuite an pha lo.
First half a chance tha vawi hnih a hloh hnuah Manchester United forward Rashford-a’n freekick mawi minute 50-naah a khung. Manchester City midfielder Phil Foden-a’n starting XI chan a phu tih lantirin an goal hnihna a khung a. Minute 68-naah Rashford-a’n dinglam atangin solo goal ropui a khung leh bawk.
England manager Gareth Southgate chuan Rashford fakin, “Club tana a inkhel thlir chuan hlim leh nuam ti takin a inkhel tih a hmuh theih. Nikum nipui a Euro a kan player hruai nen kha chuan danglam hlak a ni.” a ti.