Aizawl : Champhai khawpui bula luang Keilungliah lui khuah mek, peihfela hawn a nih hnua a enkawl zui zel kawnga hmalatu tura sorkarin a din District level committee chu nimin khan an Chairman, Champhai Bawrhsap James Lalrinchhana hovin an thukhawm leh a, hmalak zui dan tur an sawiho.
Bawrhsap chuan Keilungliah tuikhuah chu Champhai nghahfak leh rohlu, a tak ram hmuh chhoh mek zel a nih thu sawiin, duat leh thiam taka enkawl a tul avangin a enkawltu tur mumal tak siam a nih thu a sawi a. Mamawh leh tul angte ngaihtuahho thin a nih thu a sawi. Line department te leh khawtlang inkarah thawhhona tha a awm phawt chuan hlawhtling taka enkawl a nih theih thu Bawrhsap chuan a sawi bawk.
AMRUT 2.0 kaltlanga UD&PA Department-in Champhai khawpui tana sum a ruahman Rs. nuai 102 atanga Keilungliah tuikhuah cheibawl nana hmalakna tur Rs. nuai 51 dah tawh hman tangkai a nih theihna tura rawtna awmte pawh he committee hian sawihovin an pawm a. Line department hrang hrang atanga rawtna awmte leh hmalak theihnate an sawiho.
Keilungliah tuikhuah leh a vel te tangkai leh mumal zawka cheibawl nana plan & estimate chu December ni 9, 2022 ah chuan peihfel hman ni se, an ti a. December ni 15, 2022 atangin a tlawhtute atangin luh man lak tan ni se, tiin, puitling tan Rs 20, naupang tan Rs 10, two wheeler luh man Rs 20, three wheeler Rs 30 leh four wheeler Rs 50 te ni se, an ti.
Ruahman lawk ang chuan power lakluhna, Island, a hungna, a tlawhtute chawlh hahdamna, hnawm sawngbawlna, tui thianghlim in tur, gate, floral bed, vantlang inthiarna, steel cable suspension bridge, gazebo, parking area leh tul dangte siam tum a ni a. Tuikhuaha bawlhhlawh leh leinawi lut tur dan nana hmalak tulte pawh District level committee chuan an sawiho bawk.