Aizawl : Lunglei district Congress committee (LDCC)-in Congress sorkar laia NEC atanga sum hmuh hmanga Zohnuai Lungleia Science Centre building, contractor-in huntiam chhunga sa zova PWD kuta a hlan fel tawh chu tun thlenga a nihna tura hman a nih loh thu an sawi a. A ti khawbaw zawnga chetna a awm nia sawiin, mak an tih thu an sawi.
LDCC chuan “Science centre hi a ruhrel ringawt chu zawh tawh ni mahse, bungrua leh thil dang neuh neuh la zawhfel loh leh tih tur tam tak awmin Rs nuai 68 man vel zet estimate siam a ni leh a, hemi hmang hian Science & Technology Deptt lamin hna tha zawk a awm ngei an duh avangin PWD chu chhunzawm turin an ti a, kumin June thla vel khan approval letter pawh PWD kutah hlan a ni” an ti a.
“PWD hian lung te remin engemawzah an zo tawh a, mahse tunhnai te khan thuneitu ten PWD chu chawl tura an tih angin PWD pawhin an hna thawh lai an chawlhsan leh ta a ni” an ti.
Sum petu NEC thuneitute pawhin Krismas hma ngeia tih tur tul te ti zo turin PWD chu an beisei niin LDCC chuan an sawi a. Hna tha zawk thawk tura department kuta dah a nih tawh hnu leh hna pawh engemawzah thawh a nih laiin Lunglei North bialtu MLA Dr. Vanlaltanpuia’n a thuneihna hmangin PWD hnathawh lai chu a chhuhsak niin an sawi.
LDCC chuan Lunglei North bialtu MLA, MYC Chairman ni bawk chu thuneihna uchuak tak hmang tawh lo tura leh PWD hna chu PWD hnena pelet leh tura an ngen thu an sawi a. Lungleia Engineering College leh MZU Southern Campus te pawh sualchhuahsak ngei tura an ngen thu LDCC chuan an sawi bawk a ni.