PC party President Vanlalruata’n Tanhril Mualkhang rama Tui thianghlim in tur sawngbawlna Water treatment plant (WTP) tlawhin, thawktute a kawm a. WTP chu Bairabi Dam project puitlin hunah a ṭangkai zual tur thu a sawi.
E.E leh A.E Vanlalremruata leh Hmingthanhawla te bakah thawktu dang ten PC party president chu lo dawngsawngin, E.E. Vanlalremruata’n kum 2017 atanga WTP siam hna thawh ṭan a nih thu lo hrilhin, Covid-19 leh harsatna dang avanga hmalak a chak tawk thei lo chungin hna zaa 92 zawh a nih tawh thu a sawi a. Vaivakawna pipe lian phum mek leh tuilakna buaipui mek chu zawh fel a nih hunah chuan WTP aṭang hian tui MLD 37 pump chhuah a nih tur thu leh chu chuan nitin Aizawl mipui tui thianghlim in tur hnianghnara a pek theih tur thu te a sawi.
PC party President Vanlalruata pawhin WTP a hmuh dan tlangpui sawiin, phai lam aṭanga hnathawk- tu contractor te hnathawh leh an khawl bun te tha thawkhata a hriat thu a sawi a. SIPMIU leh PHE Engineer te thawhrimna leh an inpekna fakawm a tih thu sawiin, he project hi mipui tana chhawrnahawm tak a nih ziktluak ngei na turin hmalaknaa mawhphurhna chelhtu te chu ram leh mipui hmakhua chauh ngaia theihtawp chhuah zui zel turin a chah.
Vanlalruata chuan ”Helai hmuna tuilakna aṭanga tui pump theih zat hi a tamtham avangin ṭhâl-ah mamawh khawp tui a awm thei lo fo dawn a. Mahse, hei hi buaina tur a awm loh dan a awm a. Kawlphetha siamna tura ruahman Bairabi Dam project kan tihpuitlin chuan tuna tuilakna tur hmunah hian engtik lai pawhin tui a tling lung dawn a, pump tur tui awm lo a awm thei dâwn lo a ni,” a ti bawk.