Judo beihpuithlak nan Nilaini khan Thutak Nunpuitu Team inkhulhna Muanna Veng, Aizawlah Sports Minister Robert Romawia Royte chuan kawl a eng mek tih sawiin Mizoram Judo Championship vawi 25-na a hawng.
October 12 khan Gujarat-ah National Games vawi 36-na khar a ni a, judo kg 52-ah Lalhumhimi a champion. Mizoramin gold a lak awm chhun niin medal pali a thawk chhuak a, 1987 atangin Mizoramin judo atangin National Games medal pathum a dawng tawh.
Sport minister chuan, “Mizoram Judo-in hun bik hmangin an hmunpui TNT-ah silver jubilee lawma championship vawi 25-na an buatsaih chu thil lawmawm tak a ni.” a ti a. Judoka-ten Mizoram an tihmingtha thin a, tunah hian Khelo India hnuaiah Mizoram chu Centre of Excellency hnuaia judo zirna din thei tur state tlem te zingah a tel a, kawl a eng mek a ni tih a sawi.
Mizoram Judo tanpui nan cheng sing nga a hlan a, TNT-in judo an tihhmasawn zel theih nan judo khelhna mat pek an ni dawn tih sawiin Information Technology Training Centre dinsak a tum bakah Krismas chibai buk nan sial pahnih a pe dawn tih a puang bawk.
Championship thlengtu TNT hotupa Sangthankima chuan judo tihmasawn lehzual turin tan lak a ngai tih a sawi a, TNT naupangten ennawm chi hrang hrang an lantir.
Zirtawpni a zawh tur championship-ah hian club 12 atangin judoka 130 an tel a, weight hrang 32 awmin sub junior, junior leh senior huangah an inel dawn a, hetih lai hian India ram hmun hrang hranga Centre of Excellency hnuaia Mizo judoka panga an awm mek.
Mizoram Judo Association dintu zinga mi leh Patron ni mek C. Laltlanthanga chuan 1977 khan Mizoramah judo thiamna entir tan a ni a, 1987-ah association dinin 1995 October-ah Mizoram championship hmasa ber buatsaih a nih thu a sawi a. Hlawhtling taka championship vawi 25-na neih a nih theih nan Mizoram Judo Association President Ronny Rosanga Varte hnenah cheng singkhat sangnga a hlan.